Oqý-aǵartý mınıstrligi júzege asyryp jatqan jańa joba oqýshylarǵa ne beredi

ALMATY. KAZINFORM – Oqý-aǵartý mınıstrligi joǵary synyp oqýshylaryna mektepten kásibı mamandyq ıgerip shyǵýǵa múmkindik beretin pılottyq jobany júzege asyryp jatyr.

Kazinform agenttiginiń saýalyna jaýap bergen vedomstvo elimizdiń 17 óńirinde iske qosylǵan joba kadrlar daıarlaýǵa kózdelgen jergilikti bıýdjet esebinen qarjylandyrylatynyn habarlady.

Oqý-aǵartý mınıstrliginiń málimetinshe, bastama mekteptiń bilim berý júıesiniń praktıkalyq baǵytyn kúsheıtýge jáne jastardyń jumysqa erte ornalasýyna múmkindik jasaýǵa baǵyttalǵan. Kásiptik daıarlyq kolledjder bazasynda, al jalpy bilim berý pánderin meńgerý mektepterde ótedi.

- 11-synypty bitirgennen keıin oqýshylar attestat qana emes, orta tehnıkalyq bilim týraly dıplom da alady. Pılottyq jobaǵa 150-ge jýyq kolledj ben mektep, 2 myńǵa jýyq oqýshy qatysyp jatyr, - delingen vedomstvo jaýabynda.

Resmı málimetke sáıkes, joǵary synyp oqýshylary eńbek naryǵy úshin qajetti baǵyttar boıynsha bilim alady. Onyń ishinde tamaqtanýdy uıymdastyrý, avtokólikke tehnıkalyq qyzmet kórsetý jáne jóndeý, tigin óndirisi jáne kıimdi modeldeý, kıim dızaıny, grafıkalyq jáne mýltımedııalyq dızaın, dánekerleý isi, jıhaz óndirisi, shashtaraz qyzmeti qamtylǵan.

- Bıyl 905 túlek kásibı biliktilikpen qatar eńbek naryǵyna birden shyǵý múmkindigine ıe bolyp, kolledj dıplomyn alady. Joba tehnıkalyq jáne kásiptik bilim berý júıesin transformatsııalaýǵa, ekonomıkanyń naqty sektorynyń qajettilikterine baǵdarlanǵan básekege qabiletti adamı kapıtaldy qalyptastyrýǵa arnalǵan memlekettik strategııalyq baǵyt sheńberinde iske asyrylyp jatyr, - dep málimdedi mınıstrlikten.

Eske salaıyq, bıyl aqpan aıynda joǵary synyp oqýshylary kásibı mamandyqty meńgerip shyǵýǵa múmkin beretin zańdy Májilis maquldady.

Buǵan deıin kolledj bitirgenderdiń qansha paıyzy jumysqa ornalasatynyn jazǵanbyz.