Oqý-aǵartý mınıstrligi jekemenshik mektepterdiń jaǵdaıyna qatysty túsinik berdi

- Qazirgi kezde Memleket basshysy qoıǵan bilim berý salasyn memlekettik qarjylandyrý tetigin reformalaý jáne qarjylandyrýdyń naqty krıterıılerin ázirleý jónindegi tapsyrmany eskere otyryp, QR Oqý-aǵartý mınıstrligi jekemenshik mektepterdi memlekettik qarjylandyrý júıesin jetildirý boıynsha júıeli jumys bastady, - delingen vedomstvonyń Kazinform agenttigine bergen jaýabynda.

Mınıstrlik jekemenshik mektepterde memlekettik tapsyrysty qarjylandyrý tetigin qaıta qaraýdyń mynadaı negizgi tásilderin ázirledi:

• jańadan ashylatyn jekemenshik mektepterde memlekettik tapsyrysty ornalastyrýǵa moratorıı engizý;
• krıterıılerge sáıkes óńirlerdiń oqýshy oryndaryna degen qajettiligin jabatyn basym jekemenshik mektepterge ǵana memlekettik qarjylandyrýdy qamtamasyz etý, ıaǵnı memlekettik mektepterdiń bolmaýy, úsh aýysymdy oqytýdy joıý jáne apatty mektepterdiń ornyna jańa bilim berý nysandarynyń salynýy negizgi basymdyq retinde aıqyndalyp otyr;
• jekemenshik mektepterdiń belgilengen standarttarǵa sáıkestigine lıtsenzııadan keıingi baqylaýdy júrgiziledi. Bul turǵyda bilim berý sapasyn qamtamasyz etý, pedagogıkalyq kadrlarmen jasaqtaý, balalardyń qaýipsizdigin qamtamasyz etý baǵyttaryna erekshe mán beriledi.

- Mınıstrlik balalardyń qaýipsiz, sapaly jáne zańǵa sáıkes jumys isteıtin mektepterde bilim alý quqyǵyn qorǵaıdy. Maqsat - jekemenshik mektep jumysyn toqtatý nemese jabý emes, kerisinshe mehanızmdi jetildirý, tek naqty qajettilikti jabatyn mektepterge memlekettik tapsyrys berý. Jańadan ashylǵan jekemenshik mektepterge memlekettik tapsyrys berýge moratorıı jarııalanady. Tapsyrysty alatyn mektepter úsh krıterııge sáıkes anyqtalady: memlekettik mektepter bolmaǵan jerlerde, úsh aýysymdyq mektepterdi joıý maqsatynda, sondaı-aq apattyq jaǵdaıdaǵy mektep ornyn aýystyrý úshin. Jekemenshik mektepterdiń jumysyn retteý boıynsha sharalar jergilikti atqarýshy organdarmen birlese pysyqtalyp jatyr, - dep atalyp ótken Oqý-aǵartý mınıstrliginiń málimetinde.

Eske salsaq, jyl basynda «Turkistan» gazetine bergen suhbatynda Memleket basshysy Qasym-Jomart Toqaev jekemenshik mektepterdi memleketten qarjylandyrý júıesin reformalaý kerek ekenin aıtty.