Oqý-aǵartý mınıstrligi «Ustazyńdy quttyqta» chellendjin jarııalaıdy

ASTANA. KAZINFORM —  Elimiz boıynsha 25 qyrkúıek pen 5 qazan aralyǵynda «Ustaz - ult shamshyraǵy» onkúndigi ótedi. Bul týraly Oqý-aǵartý mınıstrliginiń baspasóz qyzmeti habarlady. 

Onyń aıasynda óńirlerde kún saıyn pedagogterge arnalǵan merekelik jáne taqyryptyq is-sharalar uıymdastyrylady. Bul bastama pedagog mártebesin kóterýge, ustaz mamandyǵyn keńinen nasıhattaýǵa, onyń qoǵamdaǵy erekshe rólin basa kórsetýge baǵyttalǵan.

Ustazdyq - mamandyq qana emes, uly mıssııa. Pedagogter óskeleń urpaqty tárbıelep, ulttyń zııatkerlik áleýetin qalyptastyrady, ár balanyń óz jolyn tabýyna kómektesedi. Qazirgi tańda elimizdegi 22 myńnan asa bilim berý uıymynda 6 mıllıonǵa jýyq oqýshyǵa 600 myńnan astam pedagog bilim berip jatyr.

Oqý-aǵartý mınıstrligi «Ustaz - ult shamshyraǵy» onkúndigi aıasynda «Ustazyńdy quttyqta!» chellendjin jarııalaıdy. Bul sharanyń maqsaty ár balaǵa tálim men tárbıe, ónege bergen, onyń tulǵalyq qalyptasýyna úles qosqan ustazǵa alǵys pen qurmet sezimin bildirý.

Chellendjge barlyq nıet bildirýshi qosyla alady, ol úshin:

* áleýmettik jelilerde #Ustazyńdyquttyqta #PozdravÝchıtelıa heshtegterimen quttyqtaý jarııalańyz;
* óz ustazyńyzǵa qońyraý shalyp, jyly lebizińizdi bildirińiz;
* quttyqtaý hatyn jiberip, esteliktermen bólisińiz.

Eske sala keteıik, 2023 jyldan beri Qazaqstanda Ustazdar kúni resmı túrde 5 qazanda atap ótiledi. Bul kúni elimizdiń túkpir-túpirinde ustaz eńbegin ulyqtaýǵa arnalǵan ártúrli merekelik sharalar ótedi.

Aıta ketelik mektepterde jasandy ıntellektini jaýapkershilikpen qoldaný boıynsha oqytý bastaldy.