Oqý-aǵartý mınıstrligi «Men usynǵan 7 kitap» chellendj-estafetasyn jarııalady
ASTANA. KAZINFORM - Sáýir aıynyń 13- 23 aralyǵynda elimizde Ulttyq kitap kúni men Kitaphanashylar kúnine arnalǵan onkúndik ótip jatyr. Shara aıasynda Oqý-aǵartý mınıstrliginiń Respýblıkalyq ǵylymı-praktıkalyq bilim mazmunyn saraptaý ortalyǵy baspalar arasynda «Men usynǵan 7 kitap» chellendj-estafetasyn jarııalady.
Bul bastamanyń negizgi maqsaty – qoǵamda kitap oqý mádenıetin qalyptastyrý, oqyrman qyzyǵýshylyǵyn arttyrý, sondaı-aq ulttyq ádebı murany dáripteý.
Chellendj-estafetaǵa qatysýshy baspalar óz qorlarynan oqyrman qaýymǵa usynýǵa laıyqty 7 kitapty iriktep, olardy aqparattyq resýrstar men áleýmettik jelilerde jarııalaıdy.
Sonymen qatar, bul bastamaǵa kez kelgen azamat qatysa alady. Qatysýshylar áleýmettik jelilerde súıikti kitaptary týraly usynystaryn jarııalap, ol kitaptardyń mańyzy týraly óz oılarymen bólise alady. Chellendj-estafetasyna qatysýshylar tómendegi heshtegterdi qoldana alady.
Qazaqstanda Kitaphanashylar men Ulttyq kitap kúni 23 sáýirde birge atap ótiledi.
