Oqý-aǵartý mınıstrligi mektepterdegi JI engizýdiń alǵashqy qadamdaryn túsindirdi
ASTANA. KAZINFORM — Qazaqstan mektepterine jasandy ıntellektini engizý jumystary kezeń-kezeńimen júrgiziledi. Bul júıe eń aldymen aýyl men qala mektepteri arasyndaǵy bilim sapasynyń aıyrmashylyǵyn azaıtýǵa baǵyttalǵan. Mektepterge JI engizýdiń alǵashqy qadamdaryn QR Oqý-aǵartý mınıstrliginiń Bilim salasynda sapany qamtamasyz etý komıteti tóraǵasynyń orynbasary Jámılá Esanova Jibek Joly telearnasynyń «Búgin.LIVE» baǵdarlamasynda egjeı-tegjeıli túsindirip berdi.
Mınıstrlik ókiliniń aıtýynsha, qazir jasandy ıntellektini bilim berý júıesine engizýge arnalǵan 2026-2029 jyldarǵa arnalǵan keshendi jospar ázirlenip jatyr.
Jámılá Esanova bul baǵytta eń aldymen aýyl mektepterine basymdyq beriletinin atap ótti. Sebebi eldegi 8 myńnan astam mekteptiń 65 paıyzy aýyldyq jerde ornalasqan.
— Barlyqtarymyz biletindeı aýyldyq mektep pen qalalyq mekteptiń sapasyn salystyratyn bolsaq, aıyrmashylyq bar. Sol alshaqtyqty jaqyndatyp, birdeı qylýymyz qajet. Jańa tehnologııalar osy alshaqtyqty azaıtýǵa kómektesýge tıis. Sol sebepti de aýyl mektepterine basa nazar aýdaryldy, — dedi ol.
Sonymen qatar muǵalimder arasyndaǵy «JI ustazdardy almastyrady» degen alańdaýshylyq máselesi de kóterildi. Komıtet tóraǵasynyń orynbasary jasandy ıntellektini muǵalimniń ornyna júretin júıe emes, tek kómekshi qural retinde qabyldaý qajet ekenin aıtty.
— Oqýshymen tikeleı qarym-qatynas ornatý, baǵyt berý jáne psıhologııalyq qoldaý kórsetý sııaqty dúnıelerdi tehnologııa atqara almaıdy. Sondyqtan mektepterde muǵalimniń róli saqtalady. JI ol tek qana qural retinde, kómekshi retinde, tehnologııanyń biri retinde qaraýymyz kerek. Al adamdy eshqandaı tehnologııa almastyra almaıdy, — dedi Jámılá Esanova.
Mınıstrlik qazir muǵalimderdi jasandy ıntellekt quraldarymen jumys isteýge beıimdeý jumystaryn da bastap ketken. Bul baǵytta ıÝNESKO-men birlesken arnaıy kýrstar iske qosylǵan. Kýrstar «Órleý» platformasynda tegin qoljetimdi jáne olar tsıfrlyq saýat pen JI quraldaryn qoldanýdy úıretedi. Baǵdarlamaǵa qazirdiń ózinde 300 myń pedagog qatysqan.
Jasandy ıntellektini mektepterge engizý pılottyq joba formatynda bastalmaq. Alǵashqy kezeńde shalǵaı aýyl mektepteri men keıbir qala mektepteri qamtylýy múmkin. Joba tehnıkalyq múmkindikter men ınternet sapasyna qaraı kezeń-kezeńimen júzege asady. Mınıstrlik ókiliniń aıtýynsha, pılottyq jumystar kelesi oqý jylynda bastalyp ketýi de yqtımal.
Aıta keteıik, buǵan deıin, Ázerbaıjan sarapshysy Qazaqstannyń JI-degi tájirıbesi óńirde suranysqa ıe bolatynyn aıtqan edi.
