Oqý-aǵartý mınıstrligi lıtsenzııasyz jumys istegen 66 mekteptiń 58-ine bala oqytýǵa ruqsat berdi

ASTANA. KAZINFORM — Oqý-aǵartý mınıstrligi lıtsenzııasyz jumys istegeni úshin ákimshilik jaýapkershilikkke tartylǵan 35 mekteptiń 32-sine lıtsenzııa bergen. Bul týraly vedomstvonyń Kazinform saýalyna joldaǵan jaýabynda aıtylǵan.

— Búgingi tańda respýblıka boıynsha 66 lıtsenzııasyz mekteptiń 58-i lıtsenzııa aldy, 8-i lıtsenzııa alýǵa qujattaryn daıyndaýda. Onyń ishinde 2024–2025 oqý jylynyń basynda Bilim salasynda sapany qamtamasyz etý komıteti men onyń aýmaqtyq departamentteri bilim berý qyzmetin lıtsenzııasyz júzege asyrǵan 35 jekemenshik bilim berý uıymyn anyqtady. Qazirgi tańda olardyń 32-si lıtsenzııa aldy. Atalǵan 35 mekteptiń barlyǵyna qatysty ákimshilik jaýapkershilikke tartý týraly sot sheshimderi bar, — dep jazylǵan jaýapta.

Zań boıynsha oqý protsesin tıisti ruqsat qujatynsyz bastaǵan bilim berý uıymdaryna 25 aılyq eseptik kórsetkish kóleminde (98 300 teńge) aıyppul salynady. Jańa ashylǵan mektepterge bilim alýshylardy qabyldamaı turyp quryltaı qujattaryn daıyndaý úshin 6 aı beriledi.

Memlekettik tirkeýden ótkennen keıin alty aı ishinde tıisti lıtsenzııa almasa, bilim berý uıymy sot tártibimen taratylady.

Bıyl kóktemde Joǵary aýdıtorlyq palata el aýmaǵynda 66 mektep tıisti lıtsenzııasyz bala oqytyp kelgenin anyqtaǵan bolatyn. Onyń ishinde Astanada 14 mektep, Almatyda 13 mektep, Túrkistan oblysynda 11 mektep, Atyraý oblysynda 8 mektep, Mańǵystaý oblysynda 7 mektep lıtsenzııasyz bala oqytqan.

Eske salsaq, Úkimet otyrysynan keıin ótetin baspasóz máslıhattarynyń birinde Oqý-aǵartý mınıstri Ǵanı Beısembaev jeke menshik mektepterdiń úlesi 5 paıyzǵa deıin kemýi múmkin degen boljam aıtqan bolatyn.