Oqý-aǵartý mınıstrligi bıýdjet shyǵyndaryn únemdeýge kiristi
ASTANA. KAZINFORM – Memleket basshysy Qasym-Jomart Toqaevtyń Úkimettiń keńeıtilgen otyrysynda bergen tapsyrmasyna sáıkes, bilim salasynda bıýdjet shyǵyndaryn ońtaılandyrý jumystary bastaldy. Bul týraly Oqý-aǵartý mınıstrliginiń baspasóz qyzmeti habarlady.
Mınıstr Juldyz Súleımenova óńirlik bilim basqarmalary men aýmaqtyq sapany qamtamasyz etý departamentteri basshylarymen onlaın formatta keńes ótkizdi. Kezdesý barysynda Prezıdent tapsyrmasyna sáıkes shyǵyndardy qysqartý jáne qarajatty tıimdi paıdalaný máseleleri talqylandy.
Mınıstrliktiń málimetinshe, endi bilim salasynyń resýrstary formaldy sıpattaǵy sharalarǵa emes, naqty sapaǵa baǵyttalady. Osyǵan baılanysty esep berý úshin ótkiziletin forýmdar men jıyndardyń sany qysqartylady. Respýblıkalyq jáne óńirlik is-sharalar tizimine qatań revızııa júrgizilip, tek bilim mazmunyn baıytyp, oqytý sapasyn arttyrýǵa yqpal etetin jobalar ǵana memlekettik qoldaýǵa ıe bolady.
Sonymen qatar keńeste óńirlerdegi krızıstik menedjment sapasy men bala qaýipsizdigi máselesi qaraldy. Mınıstr mektepterdegi tehnıkalyq qaýipsizdik talaptarynyń saqtalýy, beınebaqylaý júıesiniń turaqty jumys isteýi, kúzet qyzmetiniń tıimdiligi jáne oqýshylar arasyndaǵy psıhologııalyq ahýaldyń baqylaýda bolýy qajettigin atap ótti.
Óńirlik basqarma basshylaryna jergilikti jerde jedel ári batyl sheshimder qabyldaý tapsyryldy. Sondaı-aq ata-analarmen keri baılanysty kúsheıtý mekteptegi qaýipsizdik ekojúıesiniń ajyramas bóligi ekeni eskertildi.
Aıta keteıik, depýtat mektepter ornalasqan aýdandardy patrýldeýdi kúsheıtý kerektigin aıtty.