Oqý-aǵartý mınıstrligi bilim salasy qyzmetkerlerin marapattaý erejesin jańartty
ASTANA. KAZINFORM — Qazaqstan Respýblıkasynyń Oqý-aǵartý mınıstri 2026 jylǵy 15 sáýirdegi buıryǵymen salalyq kótermeleý júıesine ózgerister engizdi.
Jańartylǵan normalarǵa sáıkes, mınıstrliktiń kadr qyzmeti bilim berý basqarmalary men bilim berý uıymdaryn marapattaýǵa usynystar qabyldaý merzimderi men kvotalar týraly «Marapat» modýli arqyly (Ulttyq bilim berý derekter bazasynyń tsıfrlyq júıesinde) tıisti kúnnen nemese merekeden keminde 70 kúntizbelik kún buryn habardar etedi.
Bilim berý uıymdary menshik nysanyna qaramastan pedagogtardi, sala qyzmetkerlerin jáne bilim berý salasynyń damýyna úles qosqan tulǵalardy marapattaýǵa usyný qujattaryn jergilikti bilim basqarmalaryna keminde 50 kún buryn joldaıdy. Qujattar paketine belgilengen úlgidegi usynys pen marapattaý paraǵy kiredi.
Óz kezeginde, aýdandyq jáne qalalyq bilim bólimderi eń joǵary ball jınaǵan úmitkerlerdiń tizimin qalyptastyryp, olardy marapattaý kúnine deıin keminde 40 kún buryn oblystyq deńgeıge jiberedi.
Budan keıin oblystardyń, respýblıkalyq mańyzy bar qalalardyń jáne astananyń bilim basqarmalary belgilengen kvota sheńberinde qorytyndy tizimderdi jasap, olardy mınıstrlikke «Marapat» modýli arqyly keminde 30 kúntizbelik kún buryn joldaıdy. Qujattar tizimine sondaı-aq belgilengen nysandaǵy usynystar men marapattaý paraqtary kiredi.
Osyndaı merzim mınıstrliktiń qurylymdyq bólimsheleri, vedomstvolyq uıymdary jáne aýmaqtyq organdary úshin de belgilengen. Olar ózderi jetekshilik etetin baǵyttar boıynsha úmitkerler tizimin qalyptastyryp, kadr qyzmetine joldaıdy.
Tehnıkalyq aqaýlar týyndaǵan nemese júıege qoljetimdilik bolmaǵan jaǵdaıda qujattar elektrondyq qujat aınalymy arqyly jiberilýi múmkin.
Sonymen qatar, buıryqpen pedagogtar men bilim berý uıymdary basshylary qyzmetiniń tıimdiligin baǵalaý reıtıngisin júrgizý ádistemesine de ózgerister engizildi.
Qujat 2026 jylǵy 12 shildeden bastap kúshine enedi.
