Oqý-aǵartý mınıstrligi balalarǵa qatysty alaıaqtyq týraly eskertti

ASTANA. KAZINFORM – QR Oqý-aǵartý mınıstrligi Balalardyń quqyqtaryn qorǵaý komıteti ata-analarǵa balalarynyń ınternettegi áreketterine jiti nazar aýdarýǵa shaqyrady.

Mınıstrliktiń baspasóz qyzmetiniń habarlaýynsha, sońǵy ýaqytta jasóspirimderge baǵyttalǵan alaıaqtyq jaǵdaılary kóbeıip ketti. Alaıaqtar onlaın oıyndar men messendjerlerdi (ásirese Telegram) paıdalanyp, balalardy aldap, ata-analardyń bank kartalarynyń derekterin qolǵa túsirýge nemese kámeletke tolmaǵandardy zańsyz qarjylyq áreketterge tartýǵa tyrysady.

Balalarǵa oıyn arqyly utys utyp alýǵa nemese «ońaı aqsha tabýǵa» bolady dep sendirip:

• bank kartalarynyń sýretin CVV-kodymen birge suratady;
• kartalaryn «jalǵa berýdi» usynady;
• dostary men synyptastarynyń kartalaryn jınaýdy suraıdy.

- Bul áreketterdiń saldary óte aýyr bolýy múmkin — zań aldynda jaýapqa tartý qaýpi bar jáne balanyń psıhıkasyna, ómirge degen senimine zııan keltiredi, - delingen habarlamada.

Siz ne isteı alasyz?

• Balamen ashyq sóılesip, alaıaqtyń kim ekenin jáne nege bank kartasynyń derekterin eshkimge berýge bolmaıtynyn túsindirińiz.
• Qaýipti arnalarǵa jol bermes úshin ata-ana baqylaýyn ornatyńyz.
• Balańyz ınternette kimmen, ne jaıly sóılesip júrgeninen habardar bolyńyz.

Komıtet osyndaı jaǵdaılardyń aldyn alý men qaýipsizdikti kúsheıtý baǵytynda jumysyn jalǵastyrýda. Alaıda eń basty qorǵan — bul otbasy ishindegi senim men ashyq áńgime.

- Kúmándi áreketterdi baıqasańyz, birden quqyq qorǵaý organdaryna nemese 111 baılanys ortalyǵyna habarlasyńyz. Balalaryńyzǵa qamqor bolyńyz — olardyń qaýipsizdigi sizdiń habardar bolýyńyzdan bastalady!, - dep jazdy mınıstrliktiń baspasóz qyzmeti.

Osyǵan deıin Ulttyq bank jalǵan nesıelik shottardy paıdalaný arqyly jasalatyn alaıaqtyq shema týraly eskertkenin jazǵan edik.