Oqý-aǵartý mınıstrligi Almatyda oqýshylardyń jappaı ýlanýyna qatysty túsinikteme berdi
ASTANA. KAZINFORM — Oqý-aǵartý mınıstrligi Almaty qalasyndaǵy Respýblıkalyq fızıka-matematıka mektebindegi jaǵdaıǵa baılanysty jedel sharalar qabyldap jatyr.
Mınıstrliktiń baspasóz qyzmetiniń málimetinshe, mektepte Balalardyń quqyqtaryn qorǵaý komıtetiniń, tıisti aýmaqtyq organdardyń jáne «Órken» balalardyń ál-aýqatyn arttyrý ulttyq ǵylymı-praktıkalyq ınstıtýtynyń ókilderinen quralǵan monıtorıngtik top jumys istep jatyr.
— Densaýlyq saqtaý mınıstrliginiń aqparatyna sáıkes, as blogynda sanıtarııalyq talaptardyń buzylǵany anyqtaldy. Shekteý sharalary engizilip, oqıǵanyń mán-jaıyn anyqtaý jumystary júrgizilip jatyr. Oqý-aǵartý mınıstrligi RFMM Dırektorlar keńesi men Basqarmasyna tamaqtandyrýdy uıymdastyrýdy jáne sanıtarııalyq talaptardyń saqtalýyn baqylaýdy kúsheıtý, sondaı-aq oqýshylardyń qaýipsizdigin qamtamasyz etý jóninde nusqaý berdi, — delingen vedomstvo taratqan aqparatta.
Oqýshylardyń qaýipsizdigin jáne bilim berý protsesiniń úzdiksizdigin qamtamasyz etý úshin oqý ýaqytsha qashyqtan oqytý formatynda uıymdastyryldy.
Basym mindetter qatarynda oqýshylardyń qaýipsizdigin qamtamasyz etý, quqyqtaryn qorǵaý, oqıǵanyń mán-jaıyn jan-jaqty anyqtaý jáne tekserý nátıjeleri boıynsha qajetti sharalar qabyldaý bar.
Jaǵdaı tıisti qyzmetter men Oqý-aǵartý mınıstrliginiń baqylaýynda. Jumys Densaýlyq saqtaý mınıstrligimen birlesip júrgizilýde.
Eske salaıyq, buǵan deıin Almatyda Respýblıkalyq fızıka-matematıka mektebiniń 47 oqýshysy jedel ishek ınfektsııasynyń belgilerimen emhanaǵa jatqyzylǵany belgili boldy.
Keıin RFMM ákimshiligi oqýshylardyń aýrýhanaǵa túsýine baılanysty túsinik berdi. Búginde mektep ǵımaraty men mektep-ınternatta dezınfektsııalaý jumystary júrgizilgen. Al QR Bas memlekettik sanıtarııalyq dárigerdiń qaýlysyna sáıkes, mektep-ınternattyń jáne as blogynyń jumysy ýaqytsha toqtatylǵan. Sonymen qatar 14–16 qazan aralyǵynda mektep sabaqtary onlaın formatta ótedi.
Buǵan deıin 50-ge jýyq oqýshynyń ýlanýyna baılanysty qylmystyq is qozǵalǵany anyqtaldy.
