Oqý-aǵartý mınıstrligi «Abaı ulttyq mektebindegi» jaǵdaıǵa túsinikteme berdi
ASTANA. KAZINFORM — «Abaı ulttyq mektebine» qatysty jarııalanǵan materıaldaǵy máseleler Oqý-aǵartý mınıstrliginiń baqylaýynda. Bul týraly Oqý-aǵartý mınıstrligi Orta bilim komıteti tóraǵasynyń mindetin atqarýshy Jomart Karambaev aıtty.
— Eń aldymen, mektep basshysyz qalǵan joq. Qazirgi ýaqytta dırektordyń mindetin atqarýshy belgilengen, bilim berý protsesiniń úzdiksizdigi qamtamasyz etildi. Mekteptiń burynǵy basshylyǵy 2026 jylǵy mamyr-maýsym aılarynda júrgizilgen ishki memlekettik aýdıt aıaqtalǵannan keıin óz erkimen qyzmetten ketti, — dedi Karambaev.
Aýdıt 2023 jylǵy 1 qańtardan 2025 jylǵy 31 jeltoqsanǵa deıingi kezeńdi qamtydy. Onyń qorytyndysy 9 shildede mınıstrliktiń resmı resýrsynda ashyq jarııalandy.
Onyń sózinshe, bul rette aýdıt qorytyndysy boıynsha 10,8 mlrd teńgeden astam buzýshylyq anyqtaldy. Onyń ishinde 10,4 mlrd teńge qarjylyq buzýshylyqtarǵa jatady. Atap aıtqanda, 10,2 mln teńge bıýdjetke qaıtarylýǵa, 10,4 mlrd teńge qalpyna keltirilýge tıis. Sonymen birge 370,6 mln teńge kóleminde rásimdik buzýshylyq anyqtaldy.
— Aýdıt nátıjesi boıynsha quqyq qorǵaý organdaryna sheshim qabyldaý úshin 4 materıal joldandy. Sondaı-aq ákimshilik quqyq buzýshylyqtar boıynsha 24 aıyppul salýǵa qatysty qujattar jiberildi. Naqty tulǵalardyń kinási men jaýapkershiligi ýákiletti organdardyń quzyrynda, — dedi Orta bilim komıteti tóraǵasynyń mindetin atqarýshy.
Jomart Karambaev atap ótkendeı, turaqty dırektordy taǵaıyndaý máselesi 2026 jylǵy 1 shildede kúshine engen «Qazaqstan Respýblıkasynyń memlekettik qyzmeti týraly» jańa Zańnyń talaptaryna baılanysty qarastyrylýda. Zańnyń 89-babyna sáıkes memlekettik zańdy tulǵalardaǵy basqarýshylyq laýazymdarǵa qabyldaý tek konkýrs arqyly júzege asyrylady. Konkýrsty ótkizý tártibin memlekettik qyzmet isteri jónindegi ýákiletti organ QR Úkimetiniń apparatymen kelisip bekitýi tıis.
— Qazir tıisti qaǵıdalar bekitilý rásiminen ótip jatyr. Olar kúshine engenge deıin mınıstrliktiń konkýrs ótkizýge nemese turaqty dırektordy tikeleı taǵaıyndaýǵa quqyqtyq negizi joq. Konkýrstan tys taǵaıyndaý zań talaptaryn buzady. Qaǵıdalar kúshine engennen keıin dırektordyń bos laýazymyna ashyq konkýrs jarııalanady. Qazir Oqý-aǵartý vıtse-mınıstri Jaıyq Sharabasov, Qarjy jáne memlekettik satyp alý departamenti dırektorynyń orynbasary Elnar Sabyr jáne Y. Altynsarın atyndaǵy Ulttyq bilim akademııasynyń vıtse-prezıdenti Gúlshat Muhtarhanova «Abaı ulttyq mektebinde» jumys júrgizip jatyr. Mınıstrliktiń ókilderi mekteptegi oqý protsesiniń uıymdastyrylýyn baqylaıdy. Osyǵan baılanysty ata-analardy, pedagogterdi, oqýshylardy jáne mektep túlekterin resmı aqparatqa súıenýge, tekserilmegen málimetterdi taratpaýǵa jáne asyǵys qorytyndy jasamaýǵa shaqyramyz. Júrgizilip jatqan jumystyń qorytyndysy boıynsha qosymsha aqparat beriledi, — dep túıindedi ol.
Budan buryn Qyzylordadaǵy Abaı mektebiniń búkil oqýshysy aqyn óleńin jatqa biletinin jazǵanbyz.
