Oqý-aǵartý mınıstri mektepter qurylysyna ákimder jaýapty ekenin eske saldy

PETROPAVL. QazAqparat – Oqý-aǵartý mınıstri Ǵanı Beısembaev jańa mektepterdiń ýaqytyly tapsyrylýyna ákimderdiń jaýapkershiligi bekitilgenin eske saldy, dep habarlaıdy QazAqparat mınıstrlik aqparatyna silteme jasap.

Vedomstvonyń baspasóz qyzmetinen málim etkendeı, búgin Ǵ.Beısembaev Soltústik Qazaqstan oblysynyń ákimi Aıdarbek Saparovpen óńirdegi mektep qurylysy máselesin talqylady.
Máselen, «Jaıly mektep» ulttyq jobasy aıasynda oblys ortalyǵy – Petropavl qalasynda 4 jańa mektep salý kózdelgen. Bilim ordalaryn tórt shaǵyn aýdanda: Jas-Órken, Orman, Qopaı jáne Bereke aýdandarynda salý josparlanyp otyr. Eki mekteptiń qurylysy bıyl, taǵy ekeýi kelesi jyly bastalady. Oqý-aǵartý mınıstri qurylystyń ýaqytyly bastalyp, der kezinde aıaqtalýyna basa nazar aýdardy.
«Barlyq máseleni der kezinde jáne sapaly oryndaý qajet. Mektepterdiń ýaqytyly tapsyrylýyna ákimderdiń jaýapkershiligi bekitilgenin bilesizder. Jańa mektepterde balalardyń sapaly bilim alýyna barlyq jaǵdaı jasalýy qajet. Sonymen qatar Memleket basshysy óskeleń urpaq tárbıesine de erekshe kóńil bólýdi tapsyrdy. Bilim berý uıymdarynda balalardyń qaýipsizdigin qamtamasyz etý de mańyzdy», - dedi Ǵanı Beısembaev.