Oqý-aǵartý mınıstri bilim berý salasyndaǵy rotatsııaǵa túsinik berdi
«Bilim týraly» Zańyna «rotatsııa» uǵymy QR Parlamenti Májilisi depýtattarynyń bastamasy boıynsha 2021 jyly engizilgen. Zań jobasy bekitilgenge deıin memlekettik organdarmen, onyń ishinde eńbek jónindegi ýákiletti organmen, sondaı-aq zań qyzmetterimen kelisýden ótken, oǵan Úkimet qorytyndysy berilgen. Sondyqtan Eńbek kodeksine qaıshy emes. Zańnyń normalaryn iske asyrý úshin «Memlekettik bilim berý uıymdarynyń birinshi basshylaryn rotatsııalaýdy júrgizý qaǵıdalaryn bekitý týraly» QR Bilim jáne ǵylym mınıstrliginiń 2021 jylǵy 11 qarashadaǵy № 559 buıryǵymen bekitilip, QR Ádilet mınıstrliginde 2021 jylǵy 12 qarashada № 25128 bolyp tirkeldi jáne memlekettiń barlyq aýmaǵynda qoldanylady», - dep jazdy Ǵ. Beısembaev Májilis depýtattarynyń saýalyna jaýap bere otyryp.
Memlekettik bilim berý uıymdarynyń birinshi basshylaryna rotatsııa júrgizý qaǵıdalary Zańnyń 5-babynyń 35-1) tarmaqshasyna sáıkes ázirlendi jáne memlekettik bilim berý uıymdarynyń birinshi basshylaryna rotatsııa júrgizý tártibin aıqyndaıdy.
«Zańǵa jáne Qaǵıdaǵa sáıkes, memlekettik bilim berý uıymdarynyń birinshi basshylaryn rotatsııalaý – oblystardyń, respýblıkalyq mańyzy bar qalalardyń jáne astananyń jergilikti atqarýshy organdarynyń qaramaǵyndaǵy bilim berý uıymdarynyń birinshi basshylary arasyndaǵy bir eldi meken sheginde júzege asyrylatyn laýazymdyq aýystyrýlar.
«Memlekettik bilim berý uıymynyń birinshi basshysynyń bir uıymda 7 jyl jalpy eńbek ótili bar bolǵan jaǵdaıda rotatsııalaýǵa jatady. Bilim berýdi basqarý organdarynyń kadr qyzmeti rotatsııa júrgizý úshin rotatsııaǵa jatatyn birinshi basshylardyń tizimin qalyptastyrady. Odan keıin «Pedagogterdi attestattaýdan ótkizý qaǵıdalary men sharttaryn bekitý týraly» QR Bilim jáne ǵylym mınıstriniń 2016 jylǵy 27 qańtardaǵy № 83 buıryǵymen bekitilgen birinshi basshynyń jumys tıimdiliginiń kórsetkishteri boıynsha onnan astam jumys baǵytyn qamtıtyn esep qalyptastyrylady», - dedi mınıstr.
Tıimdilik kórsetkishteri boıynsha málimetterdi tıisti komıssııa qaraıdy.
«Rotatsııanyń maqsaty - birinshi basshynyń kásibı áleýetin tıimdi paıdalanýdy qamtamasyz etý. Sondyqtan tıimdi menedjerler rotatsııalanady, al tıimsiz menedjerler rotatsııaǵa jatpaıdy, sebebi olardyń qyzmetiniń nátıjeleri bilim sapasyn arttyrýdy qamtamasyz etpeıdi. Basshylardyń osy sanaty úshin normatıvtik qujattarda basqa sharalar qarastyrylǵan. Atap aıtqanda, QR Eńbek kodeksine sáıkes úsh jylda bir ret ótkiziletin attestattaý, basshylardyń qyzmetiniń nátıjesinde olardyń mansaptyq ósýin kózdeıdi», - dedi Ǵanı Beısembaev.
Vedomstvo málimetinshe, 2022 jylda 961 birinshi basshy rotatsııalandy jáne jańa bilim berý uıymdarynda jumys isteıdi. Almaty qalasy boıynsha 2022 jyly 8 birinshi basshy rotatsııalandy. Rotatsııa aıasynda qamtylǵan birinshi basshylardan shaǵym túsken joq.
Budan buryn habarlanǵandaı, byltyr Qazaqstanda alǵash ret bilim berý uıymdarynyń basshylaryn rotatsııalaý bastaldy.
