Oqý-aǵartý mınıstri jýrnalıster men teatr maıtalmandaryna bazynasyn aıtty
ASTANA. KAZINFORM – BIZDIÑ ORTA podkastynda qonaq bolǵan Oqý-aǵartý mınıstri Ǵanı Beısembaev jýrnalıster men teatr maıtalmandaryna bazynasyn jetkizdi.
– Qoǵam, ata-analar, pedagogter bolyp, balanyń sapaly bilim alýyna, sanaly tálim-tárbıe alýyna, azamat retinde qalyptasýyna qyzmet etýmiz qajet. Soǵan baılanysty keıde jýrnalıster de, ata-analar da muǵalimdi kóbirek alańdatatynyn aıtýymyz kerek. Keıde muǵalimderdi kinálap, tegtep jatatyn jaıttar meni de tańǵaldyrady. Máselen, muǵalimderdiń mártebesine qatysty zań qabyldandy. Al qynjyltatyn dúnıe keıbir jýrnalısterimiz ustazdardyń mártebesin túsirýge jumys isteıtin sııaqty. Aıtalyq, esirtki satqan, zorlyq, qylmys jasaǵan adam buryn muǵalim bolǵan eken dep jatady. Buryn muǵalim bolǵanyn nesine astyn syzyp aıtamyz?! Demek, jazyp otyrǵan adam muǵalimniń abyroıyna, jalpy elimizdegi 600 myń pedagogtiń atyna kir keltirýdi kóksep otyrǵany ma? Áıtpese, nesine muǵalimdi tegteıdi? - dedi Ǵanı Beısembaev.
Sonymen qatar mınıstr teatr, óner adamdary da saıqymazaq qoıylymdarǵa muǵalim obrazyn qosatynyna renishin bildirdi.
– Mundaǵy maqsaty ne? Kúlki, mazaqqa aınaldyrý. Muǵalimge qurmetpen qaraýymyz kerek. Qoǵam ustaz ataǵyn kóterýge jumys isteýi qajet. Osydan 30 jyldaı buryn áke-sheshelerimiz, ata-ájelerimiz muǵalim kórgende bas kıimin sheshetin. Ártúrli keleńsizdikti muǵalimge telip, qorǵaýdyń ornyna kiná arta beretin bolsaq, onyń abroıyna nuqsan keledi. Sondyqtan muǵalimniń qadir-qasıetin jumyla qorǵaýymyz, qoldaýymyz kerek. Muǵalim ata-ananyń, jýrnalıstik saýalyna jaýap berýmen emes, balaǵa sapaly bilim berýmen aınalysýy tıis. Keıde ata-analar da shekten shyǵyp, uıaly telefonyn alyp, mektepke basa-kóktep kirip ketedi. Olaı da alańdatýǵa bolmaıdy, - dedi ol.
Buǵan deıin Oqý-aǵartý mınıstri elimizdegi barlyq bilim ordasy zamanaýı «Keleshek mektepterine» aınalatynyn aıtqan edi. Sondaı-aq Ǵanı Beısembaev Qazaqstandaǵy mektepter bir aýysymdy oqytý júıesine qadam basqanyn tilge tıek etti. Sonymen birge suhbat barysynda on óńirdegi eski, apatty jaǵdaıda turǵan mektepter jańartylatyny belgili boldy.