Oqý-aǵartý mınıstri jekemenshik mektepterdi tekserýge qatysty pikir aıtty

Onyń aıtýynsha, osy baǵyttaǵy tekserýdi Qarjy mınıstrligi júzege asyrdy.

- Bul tekserýdi Qarjy mınıstrligi júrgizdi, óıtkeni Qarjy ortalyǵy osy vedomstvoǵa berildi. Olar biraz qyzmetti tsıfrlandyryp, tekserýdi bastady», - dedi mınıstr Úkimet otyrysynan keıingi brıfıngide.

Bul rette J. Súleımenova Oqý-aǵartý mınıstrligi jekemenshik mektepterdiń qyzmetin lıtsenzııa berý jáne lıtsenzııa berilgennen keıin de baqylaıtynyn atap ótti. Lıtsenzııadan keıingi baqylaý Bas prokýratýramen birlese júzege asyrylady.

— Lıtsenzııalaý – ol memlekettik qyzmet. Bul turǵyda birqatar talap bar. Mektepter lıtsenzııa alǵan kezde osy talaptarǵa saı bolýy kerek. Qazirgi kezeńde 2022 jyldan bastap lıtsenzııa alǵan barlyq mektepke lıtsenzııa alǵannan keıingi baqylaý júrip jatyr», - dedi vedomstvo basshysy.

Sondaı-aq jekemenshik mektepke memlekettik tapsyrys bergende, Oqý-aǵartý mınıstrligi bilim sapasyna, muǵalimderdiń biliktiligine jáne balalardyń qaýipsizdigine qatysty úsh talap qoıady.

— Mınıstrliktiń naqty ustanymy bar. Eger jekemenshik mektep jaqsy, sapaly bilim berip, ǵımaraty oqýshylardy qabyldaýǵa laıyq bolsa, muǵalimder zańnamadaǵy barlyq talaptarǵa saı bolsa, mundaı jekemenshik mektepterdi qoldaımyz, olar memlekettik tapsyrys alady. Al mundaı zańnamalyq talaptarǵa saı kelmeıtin jekemenshik mektepter memlekettik tapsyrystan qaǵylady, - dedi mınıstr.

Eske salsaq, bıyl qańtar aıynda Úkimet basshysy Oljas Bektenov jekemenshik bilim berý jáne medıtsınalyq mekemelerdi qarjylandyrý tetikterin qaıta qaraýdy tapsyrdy.

Bul rette júrgizilgen aýdıt barysynda oqýshylar men muǵalimderdi jalǵan tirkeý jáne qosarlanǵan esepke alý, ruqsat etilgen jobalyq qýattan artyq júkteý jáne taǵy basqa jaǵdaılar anyqtaldy.