Oqý-aǵartý mınıstri «Úzdik pedagog» baıqaýynyń jeńimpazdarymen kezdesti
ASTANA. KAZINFORM – Elimizde 12 jyl boıy dástúrli túrde «Úzdik pedagog» respýblıkalyq konkýrsy uıymdastyrylyp keledi. Búginge deıin jalpy sany 624 muǵalim óz mamandyǵynyń úzdigi atandy.
Pedagogtermen kezdesýde oqý-aǵartý mınıstri Ǵanı Beısembaev bilim salasynyń damýyndaǵy ustazdardyń róli mańyzdy ekenin atap ótti.
«Ustaz bolý – bul eń aldymen óz mamandyǵyńdy sheksiz súıý. Onyń urpaqqa tárbıe men bilim berýdegi eńbegi sheksiz. Ustazdyń mindeti mektep tabaldyryǵyn tarydaı bolyp attaǵan árbir balany adal adam, tulǵa retinde qalyptastyrýǵa kúsh salý ekenin aıta ketken jón. Óskeleń urpaqtyń taǵdyry muǵalimniń qolynda, sondyqtan pedagogter óziniń úlgili isi arqyly tereń bilim men joǵary mádenı qundylyqtarǵa jol kórsetetin tulǵa bolýy tıis», - dedi Ǵanı Beısembaev.
Elimizdiń úzdik ustazdary is-tájirıbelerimen, ıdeıalarymen bólisti. Sondaı-aq memleketke ózderine senim artyp, pedagogıkalyq qaýymǵa kórsetken qoldaýy úshin alǵys bildirdi.
Aıta keteıik, «Úzdik pedagog» respýblıkalyq baıqaýy 2012 jyldan beri ótkizilip keledi. Jyl saıyn 64 pedagog osy marapatqa ıe bolady. Árbir jeńimpazǵa memlekettik qoldaý retinde 1 000 AEK nemese 3 450 000 teńge kóleminde syıaqy beriledi.
