Oqý-aǵartý mınıstri oqýshylardy oqý jylynyń aıaqtalýymen quttyqtady
ASTANA. KAZINFORM – Búgin elimizdiń barlyq mektebinde bir mezgilde «Bilimim - Otanyma» biryńǵaı synyp saǵaty ótti. Synyp saǵatynyń aıasynda mınıstr barlyq mektep oqýshylaryn 2024-2025 oqý jylyn tabysty aıaqtaýymen quttyqtady.
Oqý-aǵartý mınıstrligi málimetinshe, bıylǵy oqý jyly tolaǵaı tabystar men jarqyn jetistikterge toly boldy.
– Memleket basshysynyń bastamasymen elimizde bir jyl ishinde rekordtyq kórsetkish - 257 jańa mektep ashyldy. Oqýshylarymyz halyqaralyq bilim dodalarynda 362 medal ıelenip, onyń 41-i altyn medal boldy. El tarıhynda alǵash ret kolledj stýdentterinen quralǵan Qazaqstannyń Ulttyq quramasy Frantsııada ótken 47-shi WorldSkills chempıonatynda zor tabysqa jetip, 7 medalon ıelendi. Munyń barlyǵy — otandyq bilim berý júıesindegi júıeli reformalar men qajyrly eńbektiń naqty jemisi, — dep atap ótti mınıstr.
Ol pedagogterdiń jetistikterine jeke toqtaldy. Bıyl bilim berý salasynda alǵash ret birden eki pedagog — Gúljanar Nurpeıisova men Elmara Traısova Qazaqstannyń Eńbek Eri» ataǵyna ıe boldy.
– Sizder – mekteptiń júregi, bilim men tárbıeniń altyn arqaýysyzdar. Akademııalyq bilimmen qatar, shákirtterińizge ulttyq qundylyqtardy darytyp, olardyń sanaly azamat bolyp qalyptasýyna ólsheýsiz úles qosyp kelesizder. Sizderge óskeleń urpaqqa sapaly bilim men ónegeli tárbıe berýdegi janashyrlyqtaryńyz, ustazdyq mıssııaǵa degen adaldyqtaryńyz úshin shynaıy rızashylyǵymdy bildiremin, — dedi Ǵanı Beısembaev.
Onyń aıtýynsha, osy jyldaǵy mańyzdy bastamalardyń biri – balalardyń quqyqtaryn qorǵaý júıesiniń nyǵaıa túsýi. Osy maqsatta memleket balalardyń bilim, tárbıe alýyna, damýyna jáne olardy qorǵaýǵa baǵyttalǵan úsh negizgi zań qabyldady. Sondaı-aq mınıstr barlyq ata-anaǵa kórsetken qoldaýy úshin alǵys aıtyp, 217 myń mektep bitirýshi men 173 myń kolledj túlegine jarqyn bolashaq tiledi.
Aıta keteıik, «Jaıly mektep» ulttyq jobasy aıasynda oqýshylarǵa kásibı baǵyt beretin «Mansap kompasy» atty arnaıy tsıfrlyq platforma ázirlenip jatyr. Oqý-aǵartý mınıstri Ǵanı Beısembaev «Jaıly mektepterdiń» eń basty erekshelikterin atady.