Oqý-aǵartý mınıstri oqýlyqtardaǵy 700 qate jóninde Prezıdent synyna jaýap berdi
ASTANA. KAZINFORM – Oqý-aǵartý mınıstri Juldyz Súleımenova mektep oqýlyqtary tolyq taldanyp, 700-ge jýyq qate anyqtalǵanyn aıtty. Mınıstrdiń aıtýynsha, geografııalyq ataýlardyń qate jazylýy, oqýshylardyń jas ereksheligine sáıkes kelmeıtin mazmuny jáne tarıhı datalardyń naqtylanbaýy sııaqty máseleler bar.
Bul týraly Juldyz Súleımenova Astanada ótip jatqan respýblıkalyq Tamyz konferentsııasynda tilshilerge suhbat berdi.
– Biz 1-synyptan 11-synypqa deıingi barlyq oqýlyqtyń mazmunyn qaradyq. Sol jerde 700-ge jýyq qate taptyq. Onyń ishinde oblystarymyzdyń durys jazylmaýy, jas erekshelikterine sáıkes kelmeýi, keıbir tarıhı mańyzdy datalardyń naqtylanbaýy sııaqty óreskel qateler bar, – dedi mınıstr.
Qazirgi ýaqytta anyqtalǵan qateler eskerilip, oqýlyqtardy kezeń-kezeńimen jańartý jumysy bastaldy.
– Qazir 7-11 synyp oqýlyqtary jańadan basylyp, olardyń ishindegi barlyq qateler túzetildi. Endi 9, 8 jáne 4-synyp oqýlyqtary kezeń-kezeńimen sáýir aıyna deıin basylyp shyǵady, – dedi Juldyz Súleımenova.
Mınıstr oqýlyqtardy saraptaý jumysyna ózi de qatysqanyn atap ótti.
– Bizde 15 baspa bar. Sol baspalardyń barlyq oqýlyqtaryn jeke ózim otyryp qaradym. Sonymen birge mınıstrliktiń salalyq komıtetteri men sarapshylardyń bári qarady. Jaǵa ustaıtyndaı kóptegen qatelerdi kórdik, – dedi ol.
Buǵan deıin respýblıkalyq Tamyz konferentsııasynda Memleket basshysy Qasym-Jomart Toqaev mektep oqýlyqtaryndaǵy qatelerdi synǵa alǵan bolatyn.
Sonymen qatar Memleket basshysy tekserilmegen tarıhı derekter men oqıǵalar, sondaı-aq balalarǵa jalǵan «qaharmandar» men olardyń «erligi» týraly ańyzdar engizilgen oqý materıaldaryn qaıta qaraý kerektigin aıtty.
