Oqý-aǵartý mınıstri mekteptegi tárbıe máselesine qatysty túsinik berdi

ASTANA. KAZINFORM – QR Oqý-aǵartý mınıstri Ǵanı Beısembaev bilim berý uıymdarynda qordalanǵan máselelerge qatysty pikir bildirdi.

Búgin Úkimet úıinde bolǵan baspasóz máslıhatynda tilshiler áleýmettik jelide salada qordalanǵan máseleler boıynsha Oqý-aǵartý mınıstriniń otstavkasy týraly bastama kóterilip jatqanyn jáne buǵan vedomstvo basshysy qalaısha jaýap beretinin surady. 

Óz kezeginde Ǵanı Beısembaev salada biraz jumys atqarylyp jatqanyn, tárbıege qatysty baǵdarlama byltyrdan bastap búkil mektepterge engizilgenin aıtty.

«Buǵan deıin negizgi ekpin akademııalyq bilimdi kóterýge qatysty bolsa, keıingi kezderi oryn alǵan oqıǵalarǵa baılanysty tárbıe jumysyn kúsheıtýge baǵyttaldy... Bul jumys jalǵasyn tabady. Árıne, ózgerister bar. Osy baǵyttaǵy oń nátıjeni kórip otyrmyz. Qordalanǵan máselelerdi de qarap otyrmyz. Jalpy, kez kelgen másele kóptegen jaǵdaıatqa baılanysty. Keshegi Mańǵystaýdaǵy balalardyń ýlanýyna baılanysty oqıǵaǵa toqtalsaq, bul jerde tıisti zańdarǵa ózgerister engizildi. Sondyqtan tamaqpen aınalysatyn jeke kásipkerler zańdardy tolyqqandy oryndaýy kerek», - dedi vedomstvo basshysy.

Sonymen qatar mınıstr Aqtóbe oblysyndaǵy oqıǵa boıynsha jıyn ótkizilgenin jáne ákimniń orynbasarlaryna máseleni qatań baqylaýǵa alý algorıtmi jasalǵanyn aıtty.

«Otstavkaǵa qatysty másele mınıstrdiń quzyretinde emes. Bizdiń negizgi maqsatymyz - tıisti mindetterdi atqarý, eldiń senimin aqtaý jáne Prezıdenttiń tapsyrmasyn sapaly oryndaý», – dedi Ǵ. Beısembaev.

Bul turǵyda Úkimet basshysynyń orynbasary Tamara Dúısenova qoǵamda bolyp jatqan keleńsiz jaǵdaılar tek mektepke nemese Oqý-aǵartý mınıstrligine qatysty emes ekenin atap ótti.

«Jalpy, vedomstvoaralyq suraq dep sanaımyn. Mınıstr osy keleńsiz jaıttardy retteýge qatysty tıisti baǵdarlamany Úkimetke tanystyrdy. Sol baǵdarlamany oryndaýǵa múmkindik beremiz», – dedi T. Dúısenova.