Oqý-aǵartý mınıstri mektep dırektorlaryna qoıylatyn talapqa qatysty túsinik berdi

ASTANA. KAZINFORM – Oqý-aǵartý mınıstri Ǵanı Beısembaev elimizdegi mektepterge dırektor taǵaıyndaý talaby kúsheıtilgenin aıtty.

- Jalpy talap kúsheıtildi. Sondyqtan mektepterde oryn alyp jatqan máselelerdi tolyqqandy sheshý úshin jáne kóptegen jańalyqtardy engizý turǵysynda mektep basshysynyń kreatıvti ári óte bilikti bolýy asa mańyzdy. Osyǵan qatysty Prezıdenttiń tapsyrmasymen «Bilim berýdegi ózgeristerdiń 1000 kóshbasshysy» baǵdarlamasyn qabyldap, qazirdiń ózinde 500 mekteptiń bolashaq úmitkerin daıarladyq, olar mektep dırektory bola alady. Bul rette, barlyq jaǵdaı qarastyrylǵan, ıaǵnı eshbir konkýrssyz taǵaıyndalýy sondaı-aq jalaqysynyń joǵary bolýy eskerilgen, - dedi Ǵ. Beısembaev Májilistiń jalpy otyrysynan keıin tilshiler suraǵyna jaýap bere otyryp.

Onyń aıtýynsha, dırektorlyqqa úmitkerlerdi daıarlaýmen qatar, qazir qyzmet etip jatqan mektep basshylaryn da arnaıy kýrstardan jappaı oqytý jumystary qolǵa alynyp jatyr.

Eske salsaq, bıyl aqpan aıynda Oqý-aǵartý mınıstri Ǵanı Beısembaev vedomstvonyń alqa májilisinde eldegi 740 mektepke dırektor kerek ekenin aıtqan edi.

Mınıstrlik 2023 jyldan bastap «Bilim berýdegi ózgeristerdiń 1000 kósbasshysy» jobasyn iske asyryp keledi.