Oqý-aǵartý mınıstri Ǵanı Beısembaev ǵasyr jasaǵan shymkenttik ustazdy mereıtoıymen quttyqtady
ShYMKENT.KAZINFORM — Aǵylshyn jáne nemis tilderiniń muǵalimi Valentına Ivanovna Rozým taıaýda mereıtoıyn atap ótken bolatyn. Oqý- aǵartý mınıstri Ǵanı Beısembaev ǵasyr jasaǵan qurmetti pedagogty aıtýly kúnimen quttyqtady. Bul týraly vedomstvonyń baspasóz qyzmeti jazdy.
Valentına Ivanovna sanaly ǵumyryn aǵartýshylyq qyzmetke arnap, Shymkent qalasyndaǵy № 8 jáne № 20 jetekshi gımnazııalarynda eńbek etti. Qartaıǵan shaǵyna qaramastan ardager ustaz áli kúnge deıin óz kásibine adal, tipti shóberelerine til úıretedi.
«Men kún saıyn bilim berý salasyndaǵy ózgeristerdi baqylap otyramyn. Bizdiń prezıdent muǵalimderdi, ásirese aýyldyq muǵalimderdi qoldaý úshin aıtarlyqtaı sharalar qabyldaýda. Bul bizdi qýantady. Óıtkeni, bári muǵalimge baılanysty jáne bala barlyq bilimdi muǵalimnen sińiredi. Muǵalim — bizdiń qoǵamdy tárbıeleýdegi basty býyn», — dep atap ótti pedagog.
Óz kezeginde mınıstr qurmetti ustazǵa orasan zor eńbegi, adaldyǵy jáne birneshe urpaqty tárbıelegeni úshin alǵysyn bildirdi.
«Biz ózińizdeı ustazdardy maqtan tutamyz. Búkil pedagogıkalyq qoǵamdastyq sizderden úlgi alady. Siz pedagogıkalyq mamandyqtyń beınesisiz. Sizge zor densaýlyq, otbasyńyzǵa amandyq tileımin», — dedi mınıstr.
Sondaı-aq, Ǵanı Beısembaev pedagogqa ótken jyly mınıstrlik janynan urpaqtar sabaqtastyǵyn jalǵastyrý maqsatynda pedagogıkalyq eńbek ardagerleriniń keńesi qurylǵanyn, elimizdiń 20 óńirinde bólimsheleri ashylǵanyn aıtty.
«Biz kóp jyldyq tájirıbesi bar áriptesterimizdiń kásibı kómegine senemiz. Osy baǵytta kúsh-jigerimizdi biriktirsek, balalarymyz úshin barynsha jaǵdaı jasaýǵa múmkindik týatynyna senimdimin», — dedi mınıstr.
Al, Valentına Ivanovna óskeleń urpaqty janqııarlyqpen jumys isteýge, óz elin súıýge jáne patrıot bolýǵa shaqyrdy.
