Oqý-aǵartý mınıstri ashyq dıalogty qoldaıtynyn aıtty
ASTANA. KAZINFORM — Qazaqstannyń XII Azamattyq forýmy aıasynda Oqý-aǵartý mınıstri Juldyz Súleımenova bilim salasyndaǵy qoǵamdyq jáne úkimettik emes uıymdardyń ókilderimen onlaın formatta kezdesý ótkizdi. Bul týraly vedomstvonyń baspasóz qyzmeti jarııalady.
Kezdesýge ınklıýzııa jáne balalardyń quqyqtaryn qorǵaý salasynda jumys isteıtin 170-ten astam úkimettik emes uıymdardyń ókilderi qatysty.
Mınıstr Juldyz Súleımenova azamattyq qoǵammen ózara yntymaqtastyq ornatý úshin ashyq dıalog júrgizýge daıyn ekenin bildirip, balalardy qorǵaý, oqytý jáne tárbıeleý salasyndaǵy bastamalardyń tabysty júzege asýy memlekettik organdar men qoǵamdyq uıymdardyń birlesken áreketine tikeleı baılanysty ekenin atap ótti.
— Balalardyń quqyqtary men ál-aýqatyn qorǵaý elimizdiń memlekettik saıasatynyń basym baǵyty bolyp tabylady. Biz barlyq kúsh-jigerimizdi biriktire otyryp, árbir balanyń jaqsy bilim alyp, qaýipsiz ári jaıly ortada ósýine jaǵdaı jasaýdy maqsat tutamyz. Túrli qaýip-qaterlerdiń aldyn alý, tárbıelik sharalar ótkizý jáne ata-ana men qoǵamnyń belsendi qatysýyn odan ári yntalandyrý — bizdiń strategııamyzdyń mańyzdy bóligi, — dedi mınıstr.
Sondaı-aq Juldyz Súleımenova Memleket basshysynyń qoldaýymen bilim sapasyn arttyrý, birtutas tárbıe ekojúıesin qurý, pedagogterdiń mártebesin kóterý, ınfraqurylymdy modernızatsııalaý, ınklıýzıvti bilimdi damytý jáne balalardyń qaýipsizdigin qamtamasyz etý baǵytynda júıeli jumystar júrgizilip jatqanyn atap ótti.
Kezdesýge qatysýshylar mektepke deıingi tárbıeden bastap qosymsha bilim men ınklıýzıvti orta qurýǵa deıingi túrli máseleler boıynsha óz usynystaryn ortaǵa saldy. Atap aıtar bolsaq, jekemenshik mektepterdegi bilim berý protsesi, balabaqshaǵa vaýcherlik qarjylandyrýdyń pılottyq engizilýi, arnaıylandyrylǵan mektepterde turmysy tómen otbasy balalary úshin kvota úlesin kóbeıtý, ınklıýzııalyq bilim berý, psıholog-pedagogterdiń qyzmeti, mektep ınfraqurylymy, býllıng, jetim balalarǵa qoldaý kórsetý, tehnıkalyq jáne kásiptik bilim berý uıymdarynda básekege qabiletti maman daıarlaý máseleleri kóterildi.
Onyń ishinde «Kazakh Tourizm» UK AQ qoǵamdyq keńesiniń múshesi Erkin Tikenov ınklıýzııalyq bilim salasynda tsıfrlandyrý jáne salaaralyq úılestirýde birlesip jumys jasaýdy usyndy, Qosymsha bilim berý pedagogteri qaýymdastyǵynyń ókili Ásel Temirhanova ár óńirde qosymsha bilim berýge bólinetin jan basyna shaqqandaǵy qarjylandyrýdyń ártúrliligine shaǵymdandy, Mańǵystaý oblysynan Nadejda Vadodarııa ınklıýzıvti bilim berýde pedagogter úshin biryńǵaı sabaq berý ádistemesin ázirleýdi usyndy. «Nurly analar» QQ tóraǵasy Araı Saıdalına jaǵymsyz kontentten qorǵaý maqsatynda balalarǵa arnaıy SIM-karta shyǵarýdy, Bólshek saýda jáne qoǵamdyq tamaqtaný qaýymdastyǵynan Marına Lapteva mektepterdegi tamaqtandyrý boıynsha óńirlerde barlyǵyna ortaq esepteý formýlasy bolýy tıis degen usynys bildirdi. Qostanaı qalasynyń múgedek balalardyń analarynyń «Radýga» qoǵamdyq birlestiginen Natalıa Koloskova úıden oqıtyn balalardyń máselesin kóterdi.
Árbir pikir men usynysty muqııat tyńdaǵan mınıstr ótinishterdiń nazardan tys qalmaıtynyn aıtty. Oǵan qosa, tıisti qurylymdyq bólimshelerdiń basshylaryna naqty tapsyrmalar berdi. Birqatar máseleler mınıstrdiń jeke baqylaýyna alyndy. Semeı jáne Atyraý oblystarynan baılanysqa qosylǵan turǵyndardyń ótinishterin nazarǵa alǵan Juldyz Súleımenova óńirlerge jumys saparlary barysynda olarmen jeke kezdesýge daıyn ekenin jetkizdi.
Jıyn sońynda mınıstr azamattyq qoǵam ókilderin mınıstrliktiń Qoǵamdyq keńesiniń jumysyna belsendi qatysýǵa jáne birlesip naqty bastamalardy iske asyrýǵa shaqyrdy.
Osyǵan deıin Oqý-aǵartý mınıstri balalar arasyndaǵy quqyqbuzýshylyqtyń artýyna alańdaýly ekenin jazdyq.