Oqý-aǵartý mınıstri ant berdi
ASTANA. KAZINFORM — Búgin Úkimet otyrysynda taıaýda Oqý-aǵartý mınıstri laýazymyna taǵaıyndalǵan Juldyz Súleımenova ant berdi.
- Qazaqstan halqy men Prezıdenti aldynda óz Otanym — Qazaqstannyń ekonomıkalyq jáne rýhanı damý isine barlyq kúsh-jigerim men bilimimdi jumsaýǵa, memlekettiń Konstıtýtsııasy men zańdaryn qatań saqtaýǵa, ózimniń barlyq is áreketimde zańdylyq pen ádilettilik, azamattyq, ultaralyq jáne konfessııaaralyq tatýlyq prıntsıpterin ustanýǵa, Qazaqstan halqyna adal qyzmet etýge, óz elimniń memlekettiligi men dúnıejúzilik qoǵamdastyqtaǵy bedelin nyǵaıta berýge saltanatty túrde ant beremin, ant etemin, - delingen ant mátininde.
Aıta keteıik, Memleket basshysynyń Jarlyǵymen Juldyz Dosbergenqyzy Súleımenova Oqý-aǵartý mınıstri bolyp taǵaıyndaldy.
Taıaýda Ustazdar kúnine arnalǵan saltanatty is-sharada Oqý-aǵartý mınıstri óskeleń urpaqqa sapaly bilim jáne tárbıe jumysynda ustazdarmen, ata-analarmen yntymaqtastyqta jumys júrgiziletinin atap ótti.