Oqý-aǵartý men Qorǵanys mınıstrligi oqýshylarǵa arnalǵan birlesken áskerı jıyndar ótkizedi

ASTANA. KAZINFORM - Elimizde jas urpaqtyń otansúıgishtik rýhyn nyǵaıtýǵa jáne áskerı-patrıottyq tárbıeni júıeli túrde damytýǵa baǵyttalǵan vedomstvoaralyq ózara is-qımyl jańa mazmunmen tolyqtyrylyp jatyr.

Osy maqsatta QR Oqý-aǵartý mınıstrligi men QR Qorǵanys mınıstrligi mektep oqýshylaryna arnalǵan áskerı-patrıottyq baǵyttaǵy oqý-jattyǵý jıyndaryn birlesip ótkizý jóninde ortaq sheshim qabyldady.

-Atalǵan bastama QR Oqý-aǵartý mınıstri Juldyz Súleımenova men QR Qorǵanys mınıstri Dáýren Qosanovtyń qatysýymen ótken vedomstvoaralyq kezdesýde maquldandy,-delingen QR Qorǵanys mınıstrligi taratqan málimette.

Kezdesý barysynda áskerı-patrıottyq tárbıeni mektep qabyrǵasynan bastap keshendi túrde qalyptastyrý, jasóspirimderdiń azamattyq jaýapkershiligin arttyrý máseleleri keńinen talqylandy.

Joba pılottyq formatta Jambyl, Abaı jáne Batys Qazaqstan oblystarynda iske qosylady. Sol áskerı jıyndardyń nátıjelerine qaraı, bul bastama kezeń-kezeńimen elimizdiń ózge óńirlerine de engizilmek.

Birlesken is-sharalar «Qazaqstan Respýblıkasynyń keıbir zańnamalyq aktilerine áskerı-patrıottyq tárbıe, áskerı qyzmet jáne jekelegen ortalyq memlekettik organdardyń fýnktsııalaryn qaıta bólý máseleleri boıynsha ózgerister men tolyqtyrýlar engizý týraly» zań aıasynda júzege asyrylyp, jastardy otansúıgishtikke tárbıeleý baǵytyndaǵy memlekettik saıasattyń naqty tetigine aınalmaq.

Osyǵan deıin áskerı ınstıtýtta ushqyshsyz ushý apparat mamandaryn daıarlaıtyn mektep ashylǵany týraly jazdyq.