Oqý-aǵartý birinshi vıtse-mınıstri jumys saparymen Abaı oblysynda boldy
SEMEI. KAZINFORM – QR Oqý-aǵartý birinshi vıtse-mınıstri Natalıa Jumadildaeva óńirimizge jasaǵan jumys saparynda Abaı oblysy ákiminiń orynbasary Jasulan Sarsebaevpen birge tehnıkalyq jáne kásibı bilim berý uıymdarynyń búgingi jaı-kúıimen tanysty. Ásirese, memleket basshysynyń bilim júıesin damytý, onyń sapasyn arttyrý jónindegi tapsyrmalarynyń oryndalýyna nazar aýdaryldy.
Búginde Abaı oblysynda 33 tehnıkalyq jáne kásibı bilim berý uıymy jumys jasaıdy. Sonyń ishinde joǵary IT jáne jańa tehnologııalar kolledji aýylsharýashylyǵy, qurylys, medıtsına salalaryna qajetti ınjener, operator, tehnık, elektromehanık mamandaryn daıyndalady. Atalǵan kolledjde bilim alatyn 800-ge jýyq stýdenttiń 80 paıyzy memlekettik tapsyrys negizinde tegin oqıdy. Oqý orny eń úzdik qaýipsizdik jáne ekologııalyq sheshimder tehnologııasyna negizdelgen júıemen jabdyqtalǵan. Budan basqa kolledjde stýdentter jobalarynyń arqasynda jylý jáne jaryq berýdiń ıntellektýaldy júıesi, kún energııasy, sýdy eki qaıtara paıdalaný qoldanylyp keledi.
Natalıa Jumadildaeva pedagogıkalyq ujymmen kezdesýde tehnıkalyq jáne kásiptik bilim berý boıynsha elimizde qabyldanǵan sharalardyń mańyzdylyǵyn atap ótti.
«Memleket basshysy 2025 jyldy «Jumysshy mamandyqtar jyly» dep jarııalady. Osyǵan baılanysty qazirgi jaǵdaıdy eskere otyryp, júıeni damytýdyń jańa tásilderi ázirlendi. Bul degenimiz - kolledjderdi óńir ekonomıkasyna qaraı beıimdeý, kóshbasshy kolledjderdi qalyptastyrý, kolledjderdi tıimdi basqarýdy engizý. Búginde naryqqa óz salasy boıynsha qajetti quzyrettilik pen daǵdylarǵa ıe mamandar qajet. Ásirese, kadrlyq áleýetti kóterýge basymdyq berilýi kerek», - dedi vıtse-mınıstr.
Sondaı-aq Natalıa Jumadildaeva №50 IT mektep-lıtseıinde boldy. 1200 oqýshyǵa arnalyp qurylysy bıylǵy jyly salynǵan bilim oshaǵy jaratylystaný-matematıka, baǵdarlamalaý, jasandy ıntellekt jáne robototehnıka baǵyttaryna baǵdarlanǵan. Sonymen qatar, vıtse-mınıstr jylyna 300-ge jýyq aýtızmi bar balaǵa kómek beretin ortalyqta boldy.
Sapar sońynda vıtse-mınıstr «Bilim berýdegi ózgeristerdiń 1000 kóshbasshysy» baǵdarlamasy aıasynda basshylardyń jańa quramyn jasaqtaý, balalardyń qaýipsizdigin qamtamasyz etý, ata-analarmen «Birtutas tárbıe» baǵdarlamasy sheńberinde yntymaqtastyqty arttyrý boıynsha tapsyrmalar berdi.
