Oktoberfeske kelýshiler sany rekord deńgeıge jetti
ASTANA. KAZINFORM — Mıýnhende jyl saıyn bolatyn álemdegi eń aýqymdy syra festıvali Oktoberfest-2026 merekesine 16 kún ishinde shamamen 7,4 mıllıon adam kelgen, bul — jańa rekord, dep habarlaıdy Kazinform.
Salystyrmaly túrde, 2025 jylǵy festıvalǵa 6,5 mıllıon adam qatysqan.
Uıymdastyrýshylardyń aıtýynsha, kelýshiler sany rekord deńgeıde bolýyna qaramastan, jańartylǵan qaýipsizdik jáne ońtaıly uıymdastyrý júıesiniń arqasynda qonaqtar merekeni toılaýda jaısyzdyqqa tap bolmaǵan. Jańa kameralar, jasandy ıntellekt tehnologııasy jáne Crowd Spotting júıesi festıvaldy durys uıymdastyrýǵa jáne qajet bolǵan jaǵdaıda kirýdi ýaqytsha shektep otyrýǵa múmkindik berdi. Qaýipsizdik qyzmetteri men polıtsııa festıvaldaǵy jalpy tynysh jáne qonaqjaı atmosferany atap ótti.
Oktoberfeste qonaqtar shamamen 6,7 mıllıon lıtr syra ishken, bul ótken jylǵymen salystyrǵanda 2,7%-ǵa kóp. Іri mekemeler de tamaq tutynýdyń 2-3%-ǵa óskenin habarlady.
Kelýshiler sonymen qatar alkogolsiz sýsyndar men vegetarıandyq taǵamdardy kóbirek tańdaǵan.
Medıtsınalyq qyzmet kómegine júginý sany byltyrǵydan 18,5%-ǵa ósken.
Festıvalda sonymen qatar qaıǵyly oqıǵa da boldy. Kúzetshini attraktsıon basyp qalyp, ol sonyń saldarynan jan tapsyrǵan.
16 kún ishinde Oktoberfest aýmaǵynan 92 tonna qoqys jınaldy.
Uıymdastyrýshylar atap ótkendeı, Oktoberfestiń halyqaralyq deńgeıdegi tanymal aımaqtyq festıval bolyp qala bermek. Qonaqtardyń kópshiligi bıyl da Mıýnhen jáne soǵan jaqyn óńirlerden jınaldy. Sheteldik qonaqtardyń basym kópshiligi AQSh, Italııa jáne Aýstrııa elderinen keldi.
Eske sala keteıik, Almaty bir aı boıy Alma Qala festıvalin toılady.
