Oksford ýnıversıtetinde ıslam óneri men ádepteri talqylanady
ASTANA. 19 sáýir. QazAqparat - Islam quqyǵy men ádebi ortalyǵy (CILE) sáýirdiń 30-ynan mamyrdyń 2-sine deıin Oksford ýnıversıtetiniń Taıaý Shyǵys ortalyǵynda «Óner jáne ádep» taqyrybynda semınar ótkizetinin jarııalady. Bul jaıynda Astanadaǵy Áziret Sultan meshitiniń resmı saıty habarlaıdy.
Bul atalmysh uıymnyń muryndyq bolýymen ótetin ekinshi shara bolaıyn dep tur. Sharaǵa ıslam quqyǵynyń teorııasy men tájirıbesi salasynda ter tógip júrgen ǵalymdar men mamandar shaqyrylyp otyr. Semınardy uıymdastyrýshylar ıslam óneri men onyń ádebi jaıly málimetterge qol jetkizetinine úmitti. Semınarǵa Fıqh jónindegi eýropalyq keńestiń múshesi, doktor Abdalla ál-Jýdaı, jazýshy, doktor Áli ál-Omarı, ál-Azhar joǵarǵy oqý ornynyń ǵalymy, doktor Essam Tallema sekildi kórnekti tulǵalarmen qatar Shvetsııadan, Marokkodan jáne Kanadadan delegatsııalar qatysady.
«Islam óneri men ádebi ortalyǵy qoldanbaly ádep negizinde ıslam quqyǵy men ádep máselelerin zerdeleıdi. Atalmysh ortalyq qasıetti Quran men Súnnettiń jáne Islamnyń bıik maqsattary negizinde jańarýǵa, jańǵyrýǵa bastaıtyn reformalardy belgileý arqyly álemdi ádiletti ári ádepti etýge yqpalyn tıgizýdi kózdeıdi», - dep jazady muslim.kz.
