Oksford ýnıversıteti men Vatıkannyń kitaphanalary 1,5 mln. bettik ejelgi mátinderdi Internetke ornalastyrady
ASTANA. 13 sáýir. QazAqparat - Oksford ýnıversıtetiniń Bodleın jáne Vatıkannyń Apostoldyq kitaphanalary 1,5 mln. betke jýyq ejelgi teksterdi sandyq formatqa aınaldyryp, erkin qoljetimdi túrde Internetke ornalastyrady,
dep habarlady ITAR-TASS. Bul týraly osy búkil álemge tanymal kitaphanalardyń ókilderi málimdedi.
Málim bolǵanyndaı, manýskrıptiler men kitaptar negizgi úsh taqyryptyq sala: grek manýskrıpteri, XV ǵasyrdaǵy basylǵan kitaptar jáne ejelgi evreı tilindegi manýskrıptiler salalary boıynsha sandyq formatqa kóshirilmek. Jobany júzege asyrý úshin materıaldardyń úshten ekisin Vatıkannyń kitaphanasy usynyp otyr. Bul ıdeıanyń avtorlary ony júzege asyrý osy eki kitaphananyń orasan zor muraǵattaryn biriktirýmen qatar, qalyń oqyrmandar men zertteýshiler úshin ejelgi jádigerlikterdi qoljetimdi etýge múmkindik beredi dep sanaıdy.
Bul jobany júzege asyrýǵa 2 mln. fýnt sterlıng (3,17 mln. dollar) jumsalmaq, bul qarjyny brıtandyq «Polonskı faýndeıshn» qory berip otyr.
