Oksford stýdentteriniń qazaq mádenıetine qatysty zertteýleri óte tereń — Oksford muǵalimi

ASTANA. KAZINFORM — Oksfordta qazaq tilinen bilim alatyn stýdentter el tarıhy men mádenıetin qazaqtardyń ózinen artyq biledi. Bul týraly álemdegi eń kóne ýnıversıtette sabaq beretin muǵalim Dıdar Sadyq aıtty.

– Bıylǵy akademııalyq jylda 10-nan asa stýdent bilim alyp jatyr. Olardyń bári sabaqqa qalmaı keledi. Kóbi brıtandyqtar. Odan bólek Eýropadan, Taıaý Shyǵystan kelgen mýltımádenıetti bilimgerler de sabaqqa qatysyp jatyr, – deıdi ol «Búgin LIVE» baǵdarlamasyna bergen onlaın suhbatynda.

Ustaz qazaq tilin sheteldik stýdentterge úıretýdegi basty qıyndyqtarǵa toqtaldy.

– Qazaq tilin sheteldik stýdentterge úıretýde árıne qıyndyqtar bar. Sebebi, biz barlyǵyn nólden bastaımyz. Qazaq tili boıynsha eshqandaı bilimi joq stýdentterge sabaq beremiz. Al qazirgi tańda qazaq tiliniń shet tili retindegi aǵylshyn tildi aýdıtorııaǵa arnalǵan bazasy tolyqqandy qalyptaspaǵan. Sol turǵydan biraz qıyndyqtar bar. Biraq biz sol qıyndyqtardy eńserý úshin osynda júrmiz, – deıdi muǵalim.

Dıdar Sadyq sheteldik stýdentterdiń qazaq tiline degen kózqarastary týraly da aıtty.

– Stýdentter tilge qatysty qıyn degen pikir aıtqan joq. Óıtkeni Oksford ýnıversıtetine túsýdiń ózi ońaı emes. Ol jaqta 100 paıyz ótinishtiń ishinen 7–8 paıyzy ǵana qabyldanady. Sondyqtan munda álemniń túpkir-túpkirinen eń daryndy stýdentter ǵana qabyldanady. Sol úshin bilimgerlerdiń bári óte alǵyr. Qazaqstan, Ortalyq Azııa, Eýrazııa boıynsha zertteýleri óte tereń. Olar tilden buryn, mádenıeti, ádebıeti, saıasaty, tarıhy týraly bizden artyq biledi dep aıta alamyn, – deıdi ustaz.

Eske sala keteıik, byltyr QR Syrtqy ister mınıstri Murat Nurtileý men Ulybrıtanııa Syrtqy ister mınıstri Devıd Kemeronmen kezdesip, Oksford ýnıversıtetinde qazaq tili kýrstaryn ashý týraly memorandýmǵa qol qoıǵan edi.

Al qazaq tili resmı túrde bıyl maýsym aıynda arnaıy baǵdarlama negizinde oqytyla bastady.