Oksana Ten: Aýrýhanaǵa əkelgende balamnyń júreginde qan bolmaǵanyn sezdim
ALMATY. QazAqparat - Búgin Almatyda Denıs Tenniń ólimi boıynsha ótip jatqan sotta sportshynyń anasy Oksana Ten túsinikteme berdi, dep habarlaıdy QazAqparat tilshisi sot zalynan.
«Men dərigerdiń otbasynda óskendikten, Denıstiń aýrýhanaǵa əkelgendegi jaǵdaıyn shamamen bildim. Sebebi san arterııasy kesilse, dərigerlerdiń ózderiniń aıtýynsha, ol qandy toqtatý múmkin emes. Bul ómirlik mańyzdy organ. Olar adamnyń tiri qalmaıtynyn bilmedi degenge senbeımin. San tamyryn baılaý úshin oǵan jetýge ýaqyt kerek. Ondaı jaraqat alǵan adam dəriger ústelinde 15 mınýtta ólip ketedi. Al sportshynyń júregi eki ese shynyqqan. Eki ese tez jumys jasaıdy, qan jyldam aınalady. Denısti aýrýhana əkelgende men shamamen bildim. Onyń júreginde qan qalmaǵanyn túsindim. Qan qatty jyldamdyqpen aınalǵan kezde bəri aǵyp ketken. Meniń dərigerlerge alǵysym sheksiz. Olar qoldan kelgenin jasady»,- dedi Oksana Ten.
Eske salsaq, Denıs Tendi bıyl 19 shildede Almaty qalasynda belgisiz bireýler pyshaqtap ketken edi. Aýyr halde aýrýhanaǵa jetkizilgen sportshy kóz jumǵan bolatyn.
Denıs Tenniń ólimine qatysty qylmystyq is qozǵalyp, kúdiktiler izdestirildi. Elbasy Denıs Tenge qatysty qylmysty muqııat tekserýdi tapsyrdy. Keıin QR ІІM kúdiktilerdiń ustalǵanyn jarııa etti. Al, qyrkúıek aıynyń sońynda Іshki ister mınıstri Qalmuhanbet Qasymov atalmysh qylmystyq istiń tergelýine qatysty málimet bergen bolatyn. 25-jeltoqsanda Almatynyń qylmystyq ister boıynsha aýdanaralyq mamandandyrylǵan sotynda belgili sportshynyń ólimi boıynsha aldyn ala sot tyńdalymy ótken bolatyn.
