Ókpesiniń 90 paıyzy zaqymdanǵan almatylyq koronavırýsty qalaı jeńgenin aıtyp berdi

«Birinshi kúni tamaǵym jybyrlap aýyrdy. Sodan keıin ystyǵym 39 gradýsqa deıin kóterildi. Dene qyzýym on kún boıy túspedi. Úshinshi kúni maǵan ókpeniń isinýi dıagnozy qoıyldy. Besinshi kúni tynys alýym qıyndap ketti, sondyqtan meni ókpeni jasandy jeldetý apparatyna qosty», - dep eske alady Edýard Kım.

Dárigerlerdiń tekserýinen keıin onyń qos ókpesi 90% zaqymdanǵany anyqtalyp, pnevmonııa dıagnozy qoıyldy. Sonymen qatar, COVID-19-ǵa arnalǵan PTR test oń nátıje berdi.

«Óz betimshe tynys alý óte qıyn boldy. Keýde tusymda qatty aýyrsyný paıda boldy. Dert tez dendep ketti. Juqpaly aýrýlar bólimine túsken kezde men koronavırýs ınfektsııasyn anyqtaý úshin PTR testin tórt ret tapsyrdym. Barlyq synaq oń nátıje kórsetti», - dedi Edýard Kım.

Almatydaǵy №7 qalalyq klınıkalyq aýrýhanasynyń juqpaly aýrýlar bóliminiń meńgerýshisi Uljan Apbasova atap ótkendeı, naýqas aýrýhanaǵa jedel járdemmen óte aýyr jaǵdaıda jetkizildi. Patsıentte ýremııalyq ıntoksıkatsııa, ıntoksıkatsııa sındromdary, sondaı-aq aýa jetispeýshiligi boldy.

«Naýqas aýrýhanaǵa túsken kezde esin emis-emis bildi. Jaǵdaıy aýyr boldy. Ózdigimen áreń demaldy. Qabyldaý kezindegi satýratsııa 82% boldy. Naýqas shuǵyl túrde qarqyndy terapııa aldy, jaǵdaıy turaqtalǵannan keıin juqpaly aýrýlar bólimine aýystyryldy. Sondaı-aq, naýqas aýrýhanada bolǵan kezde baǵdarlamalanǵan gemodıalız seansyn qabyldady», - dep tolyqtyrdy Uljan Apbasova.

Dárigerdiń aıtýynsha, patsıent qanaǵattanarlyq jaǵdaıda úıine shyǵarylǵan.

«Aýrýhanadan úıine shyǵarylǵan naýqastyń jaǵdaıyn únemi qońyraý shalyp bilip otyrdyq. Ol dárigerlerdiń baqylaýynda boldy. Naýqastyń tez saýyǵyp, densaýlyǵynyń jaqsarǵanyna qýandyq», - dedi ol.

Edýard Kımniń aıtýynsha, jaqsy nárseni oılaý jáne jaqsylyqqa sený oǵan aýyr pnevmonııa men koronavırýsty jeńýge kómektesti.

«Men negizi pozıtıvti adammyn. Ómirde kezdesetin kez kelgen qıyn jaǵdaıǵa týra qaraıtyn janmyn. Koronavırýs juqtyrǵanymdy bilgende depressııaǵa túspeýge tyrystym. Men bári jaqsy bolady dep sendim. Meniń ómir súrgim keldi, sondyqtan aýrýmen kúrestim. Adam ómir boıy kúresýge májbúr bolatyn, odan da jaman aýrýlar bar ǵoı. Qasymda 60 jastan asqan bir naýqas jatty, ol depressııaǵa túsip ketti. Ol bárine pessımıstik kózqaraspen qarady jáne ózin ólim aýzynda jatyrmyn dep sendirdi», - deıdi ol.

Sonymen qatar, ol ózin aman alyp qalǵan barlyq medıtsına qyzmetkerlerine alǵysyn aıtty.

«Maǵan medıtsınalyq kómek kórsetken barlyq dárigerlerge rızashylyǵymdy bildirgim keledi, olar - Irada Bıjkenova, Uljan Apbasova jáne mekemeniń barlyq medıtsına qyzmetkerleri. Bilikti mamandar jolyǵyp, shynymen de jolym boldy», - dep qosty ol.

Edýard Kım ómir boıy júrgizýshi bolyp jumys istegen. Qazir ol bıznespen aınalysady. Eki balasy men bir nemeresi bar.

«Ólim aýzynan qalǵan meniń ómirge degen kózqarasym ózgerdi. Ómirdiń ár sátin baǵalap, densaýlyǵyma kóńil bóle bastadym. Baqytymyzǵa oraı, otbasymyzda koronavırýspen men ǵana aýyrdym. Endi salaýatty ómir saltyn ustanamyn. Qazir barlyq sanıtarlyq jáne qaýipsizdik erejelerin saqtaýǵa tyrysamyn»,– dep túıindedi áńgimesin Edýard Kım.