Ókpesiniń 70 paıyzy zaqymdanǵan 72 jastaǵy keıýana koronavırýsty jeńip shyqty
TARAZ. QazAqparat - Jambyl oblysy Qordaı aýdanynyń 72 jastaǵy turǵyny L. Sýdnık ınfektsııany halyq kóp jınalatyn qoǵamdyq orynda juqtyrǵan, dep habarlaıdy QazAqparat oblystyq densaýlyq saqtaý basqarmasyna silteme jasap.
Onyń aıtýynsha, aýrý aıaq astynan bastalǵan, dene temperatýrasy 39 S deıin kóterilip, qurǵaq jótel paıda bolǵandyqtan bastapqyda JRVI dep oılap, 7 kún boıy úıinde antıbıotıktermen emdelgen.
Alaıda, úıde qabyldaǵan em kómektespeı, artynsha tynysy tarylyp, alqyna bastaǵandyqtan jedel járdem kóligimen naýqas aýdandyq aýrýhanaǵa jetkiziledi.
«Keýde qýysynyń rentgenografııasy jáne PTR dıagnostıkalyq zertteý qorytyndysynda «vırýstyq pnevmonııa» dıagnozy anyqtaldy. Qordaı aýdandyq aýrýhanasynda naýqas bes kún boıy em qabyldaǵan, alaıda jaǵdaıy jaqsarmady. Sosyn ony Jambyl oblystyq kópbeıindi balalar aýrýhanasynyń juqpaly aýrýlar qurylymyna aýystyrdy. 5-shi bólimniń meńgerýshisi Tanabaeva A. jáne emdeýshi dáriger Tlekeeva A. naýqastyń ókpesiniń 70% zaqymdanǵanyn anyqtady» dep habarlady basqarmadan.
Patsıenttiń eki ókpesi birdeı qabynyp, sonyń saldarynan ókpesine aýa jetpeı qalǵan. Dárigerler egde jastaǵy áıelge onyń aýrýynyń dárejesin túsindirip, emdeý josparymen bólisti.
Aq halattylarǵa senim bildergen ol barlyq taǵaıyndaýlardy qatań saqtady. Nátıjesinde 16 kúnniń ishinde qart ana qaýipti indetten qulan-taza aıyqqan.
Aýrýhanadan shyqqan L.Sýdnık medıtsına qyzmetkerlerine kásibıligi men iltıpaty úshin alǵys aıtyp, aýrýhana qyzmetkerlerine densaýlyq pen amandyq tiledi.
