Ókpesi 90 paıyz zaqymdanǵan tarazdyq indetti jeńip shyqty
Taraz qalasynyń jastaǵy turǵyny, óziniń týǵan kúninde qalalyq kópbeıindi aýrýhanadan saýyǵyp shyqty. Týra bir aı boıy koronavırýspen alysqan ol, shilde aıynyń ortasynda ókpesiniń 90 paıyz zaqymdanýymen aýrýhanaǵa aýyr halde túsken. Eki apta boıy jansaqtaý bóliminde jatyp, jasandy jeldetý apparatynda bes kún, ókpeni ınvazıvti emes jeldetý apparatynda úsh kún em qabyldaǵan.
«Koronavırýsqa shaldyqqan naýqastarmen tikeleı qarym-qatynasqa túsken joqpyn, degenmen ózim bazarda saýda-sattyqpen aınalysamyn, onda adam kóp, olardyń vırýs juqtyrǵan-juqtyrmaǵanyn bilmeısiń. Shildeniń basynda aýyryp qaldym. Dertti bazardan juqtyrdym, sebebi qonaqqa barǵan joqpyz, jaqyndarymdy kórmegeli birneshe aı boldy. Tek telefon arqyly habarlasyp turamyz. Aldymen álsirep, tońyp, dirildeı bastadym.
Birneshe kúnnen keıin ıis pen dám sezbeı qalǵanymda, Covid juqtyrǵanymdy túsindim. Úıde birneshe kún emdelip, jótel údep, qan aralas qaqyryq shyqqan soń, jedel járdemmen aýrýhanaǵa keldim. Men óz-ózime kele almaı, tynys alý apparatynda jatyp, o dúnıeni kórdim desem bolady. Maǵan ekinshi ómir syılaǵan aq halatty abzal jandarǵa myń alǵys.
Kovıdke áli de senbeıtin adamdarǵa aıtarym: vaktsına saldyrtyńyzdar, densaýlyqqa artyq qaýip tóndirýdiń qajeti joq», – deıdi ol.
«Patsıenttiń saýyǵýy bir ǵana dárigerdiń emes, naýqastyń óziniń emdelýge degen yntasyna da baılanysty. Koronovırýspen aýyrǵan adam bar kúshin osy dertti jeńýge jumsaýy tıis. Aǵza álsirep qalady, sondyqtan ózin-ózi kútip, qalypqa keltirý qajet. Ol úshin toı-tomalaqtan, jıyndardan, adam kóp shoǵyrlanatyn oryndardan bas tartý kerek. Dárýmenge baı tamaqtardy iship, uıqyǵa mán berý, taza aýada serýendeý, sportpen shuǵyldaný, salaýatty ómir saltyn qalyptastyrýǵa kóp kóńil bólý kerek», – deıdi emdeýshi dáriger Parıda Qurmanbaeva.
Aýrýhana qyzmetkerleri aýrýynan aıyǵyp shyqqan týǵan kún ıesin úıine shyǵaryp saldy ári ony dúnıege kelgen kúnimen quttyqtady.