Ókpesi 100 paıyz zaqymdanǵan Taraz turǵyny koronavırýstan emdelip shyqty
TARAZ. QazAqparat – Ókpesi 100 paıyz zaqymdanǵan 60 jastaǵy tarazdyq koronavırýsty jeńip shyqty, dep habarlaıdy QazAqparat tilshisi.
Taraz qalasynyń turǵyny 60 jastaǵy azamat aýyr halde qalalyq kópbeıindi aýrýhanasynyń juqpaly aýrýlar qurylymyna kelip tústi. Týystarynyń aıtýy boıynsha, naýqas tumaý belgilerine uqsas aýrýdy óz betinshe emdeýge tyrysqan. Biraq derti odan saıyn asqynyp, tynysy tarylyp, entige bergen soń, shuǵyl túrde qalalyq kóp beıindi aýrýhanasyna keledi. Qabyldaý bóliminde patsıenttiń qan taldaýlary tekserilip, kompıýterlik tomografııaǵa túsirildi. Nátıjesinde ókpeniń 100 paıyz zaqymdalǵany anyqtalyp, jansaqtaý bólimine jatqyzyldy.
Eki apta boıy ókpeni jasandy jeldetý apparatyna qosylǵan patsıentke dárigerler keshendi em-dom jasap, qıyn jaǵdaıdan shyǵarady. Ózdiginen dem ala bastaǵan soń, ol jalpy bólimshege aýystyrylady. Zaqymdanǵan ókpeni qalypqa keltiretin em-sharalar 60 kúnge sozyldy.
«Men óz-ózime kele almaı, tynys alý apparatynda jatyp, o dúnıeni kórdim desem bolady. Aq halatty abzal jandarǵa myń alǵys. Mundaǵy barlyq dárigerlerge, medbıkelerge, meıirgerlerge, tazalyqshy qyzdarǵa ekinshi ómirdi syılaǵany úshin kóp raqmet. Kovıdke áli de senbeıtin adamdarǵa, vaktsına saldyrtyp, kútim jasaýdy usynamyn, densaýlyqqa artyq qaýip tóndirýdiń qajeti joq», – deıdi ol.
Kúndelikti emdeý barysyn basshy ǵana emes, tájirıbeli de bilikti dáriger Erbol Saǵyndyqov bastaǵan aýrýhana meńgerýshileri de baqylap otyrǵan.
60 jastaǵy azamat barlyq medıtsına qyzmetkerlerine shyn júrekten alǵys bildirýde. Búginde dárigerlerdiń jasaǵan durys emi men tıimdi tásili arqasynda tolyq saýyǵyp, úıine shyǵaryldy.
