Ókpeniń sozylmaly obstrýktıvti aýrýy: qalaı emdeýge jáne aldyn alýǵa bolady
ALMATY. Qazaqparat - Jyl saıyn qarasha aıynyń úshinshi sársenbisinde DDU bastamasymen dúnıejúzilik ókpeniń sozylmaly obstrýktıvti aýrýyna qarsy kúres kúni atalyp ótedi, dep habarlaıdy QazAqparat tilshisi.
Kardıologııa jáne ishki aýrýlar ǴZI professory, medıtsına ǵylymdarynyń doktory Saýle Hasenova ókpeniń sozylmaly obstrýktıvti aýrýy bar patsıentterge dertke asa muqııat qaraýǵa jáne ýaqytynda medıtsınalyq kómekke júginýge keńes beredi.
«Pýlmonologqa qaralý ÓSOA bar patsıentke durys em qabyldaýǵa jáne aýrýdyń asqynýynyń damýyna jol bermeýge múmkindik beredi. Dáriger ár patsıentke qajetti ıngalıatorlar men dozalardy tańdap beredi. ÓSOA asqyný sebebi 80% jaǵdaıynda bakterııalar men vırýstar bolatyndyqtan, ár adamnyń aldynda bakterııaǵa qarsy preparattardy tańdaý týraly suraq týyndaıdy»,-deıdi dáriger.
ÓSOA profılaktıkasy qaýip faktorlarynyń áserin azaıtýǵa baǵyttalǵan. Temeki shegýden sanaly túrde bas tartý ókpe men bronh fýnktsııasynyń qalypty qurylymyn saqtap qalýǵa kómektesedi.
« Naýqastarǵa vaktsınoprofılaktıka jasaý qajet. ÓSOA bar patsıentterge pnevmokokk ınfektsııasynan jáne tumaýdan jyl saıyn vaktsına jasaý usynylady. Vaktsına jasaý kezinde pnevmonııanyń damý qaýpi, ÓSOA asqynýy, emdelýge jatqyzý jáne ólim jaǵdaıy azaıady. Mamandandyrylǵan medıtsına ortalyqtarynda da, sonymen qatar óz betinshe úıde jasalatyn ókpe reanımatsııasynyń múmkindikteri týraly da esten shyǵarmaý kerek. Oǵan bronh tarmaǵynyń drenajdy qyzmetin jaqsartýǵa baǵyttalǵan durys tańdalǵan tynys alý gımnastıkasy, tynys alý bulshyqetteriniń emdik massajy, emdeýdiń fızıoterapevtik ádisteri, saıabaq aımaqtarynda serýendeý, oksıgenoterapııa jáne tynys alý aǵzalaryn qalpyna keltirýdiń basqa túrleri kiredi»- deıdi Saýle Hasenova.
Sonymen qatar, ol aýrýdyń alǵashqy belgileri týraly aıtty.
«Kún saıyn, onyń ishinde kúndizgi ýaqytta jótel paıda bolady. Odan ári tańerteńgi ýaqytta azdap qaqyryq bóline bastaıdy. Keıinnen oǵan demigýdiń damýy qosylady, ol az ǵana júkteme nemese respıratorlyq ınfektsııalar kezinde kúsheıe túsedi. Dıagnoz qoıý úshin pýlmonologtyń konsýltatsııasyn alyp, spırometrııa ádisimen syrtqy tynys alý fýnktsııasyna zertteý júrgizilýi tıis. Sonymen birge temeki shegýshi patsıentterge olarda syrtqy tynys alý fýnktsııasynyń buzylýyn erte anyqtaý úshin spırometrııalyq zertteýler júrgizý qajet»,- qortyndylady dáriger.
