Ókpeniń qaterli isigine shaldyqqan naýqastardyń 80% -y dárigerge asqynǵan kezde keledi
ALMATY. QazAqparat- Almatyda Qazaq onkologııa jáne radıologııa ǵylymı-zertteý ınstıtýtynda «Ókpe qaterli isigi. Ozyq sheshimder» atty halyqaralyq ǵylymı-praktıkalyq onlaın konferentsııa ótip jatyr, dep habarlaıdy QazAqparat tilshisi.
Jıynyń ashylýynda Qazaqstannyń bas onkology, professor, Qazaq onkologııa jáne radıologııa ǵylymı-zertteý ınstıtýtynyń dırektory Dılıara Qaıdarova eldegi onkologııalyq máselege toqtalyp, qaterli isikti erte kezeńde anyqtaý joldary jaıly aıtyp berdi.
«Ókpe qaterli isigi 21 ǵasyrda da mańyzdy máseleniń biri. Jyl saıyn Qazaqstanda ókpe qaterli isiginen 3500-deı adam aýyrady. Sondaı-aq jylyna 2 myńnan astam naýqas ómirden ótedi. Kún saıyn 7 adam osy aýrýdan qaıtys bolady. Bizge keletin naýqastardyń 80%-y syrqatyn asqynydyrap alǵandar. Sondyqtan búgin isikti erte kezeńinde anyqtaý jáne aldyn alý skrınıngteri, terapııanyń ınnovatsııalyq ádisi jaıly aıtamyz»,-deıdi Dılıara Qaıdarova.
Konferentsııaǵa Italııa, Túrkııa, Ispanııa, Reseı, Belarýs jáne Qazaqstannyń onkologııalyq ortalyqtardyń sarapshylary qatysyp jatyr.
«Qazir Qazaqstanda ókpe isigin erte kezeńinde anyqtaý úshin keshendi skırınıngti engizgeli otyrmyz. Ol tómen dozaly kompıýter tomografııasymen jasalady. Bul ádis ókpe ragyn erte kezeńde anyqtaýǵa múmkindik beredi. Sáıkesinshe ony emdeý jeńil bolady»,- deıdi Bas onkolog.
Konferentsııa sheńberinde torakaldy hırýrgııa boıynsha sheberlik synyptar ótedi.
Shara Qazaqstan Respýblıkasy Densaýlyq saqtaý mınıstrliginiń qoldaýymen jáne «Qazaq onkologııa jáne radıologııa ǵylymı-zertteý ınstıtýty» AQ, «Qazaqstandyq onkologtar qaýymdastyǵy» QB uıymdastyrýmen ótip jatyr.
