Ókpeni jasandy jeldetý apparatynyń quny qansha – mınıstrlik jaýaby

NUR-SULTAN. QazAqparat – QR Indýstrııa jáne ınfraqurylymdyq damý vıtse-mınıstri Talǵat Janjúmenov Qazaqstanda jasalatyn ókpeni jasandy jeldetý apparatynyń baǵasy týraly suraqqa jaýap berdi, dep habarlaıdy QazAqparat tilshisi.

«Bir ÓJJ apparaty kompressor, ylǵaldaýysh jáne ózge de qajetti quraldarymen birge jáne tasymaldaý shyǵyndaryn qosqanda 8,9 mln teńgege aınalady. ÓJJ apparattarynyń tolyq emestigi týraly senator syny rastalsa, búgin otstavkaǵa ketýge ázirmin», - dedi Talǵat Janjúmenov mınıstrlikte ótken brıfıngte.

Sonymen birge, vıtse-mınıstr «Qazaqstandyq ÓJJ apparattary elektr qýatynsyz jumys isteı ala ma?» degen suraqqa jaýap berdi.

«Jaryq sónip qalsa da, barlyq aýrýhanalar rezervtik qýat kózimen jabdyqtalǵan. Munda generator emes, kompressor týraly aıtyp otyrmyz. Elektr energııasy emes, statsıonarlyq ottegi jetkizý jóninde. Ókinishke qaraı, statsıonarlyq ottegi berý júıesi elimizdiń barlyq aýrýhanasynda joq. Sol úshin de bul qurylǵylar qosymsha kompressormen jabdyqtalǵan, olar ottegin tolyqtyryp turady. ıAǵnı, ortalyq ottegimen jabdyqtaý júıesi bolmasa da, olar ózdiginen jumys isteı alady. Aýyr ottegi ballondaryn tasý qajet emes», - dedi T. Janjúmenov.

Buǵan deıin senator Nurlan Qylyshbaev respýblıkalyq bıýdjet qarajatyn jumsaýdy, ásirese memlekettiń áleýmettik mindetterdi oryndaýyna jáne COVID-19-ǵa qarsy kúres jónindegi sharalarǵa baılanysty tásilderdi qaıta qaraýǵa shaqyrdy.

«Indýstrııa jáne ınfraqurylymdyq damý mınıstrligi Úkimet rezerviniń qarajaty esebinen otandyq óndirýshiden 1500 dana ÓJJ apparatyn satyp alǵan, 17 óńirdiń densaýlyq saqtaý uıymdary is júzinde tek 831-in ǵana qabyldady. Qalǵan 669 ÓJJ apparaty tolyqtyrylmaǵany úshin qabyldanbaǵan», - dep málimdedi depýtat.