Ókpe obyryna tekserýden ótkenderdiń 4,3%-ynan kúmándi ózgerister anyqtaldy
ASTANA. KAZINFORM – Qazaqstanda ókpe obyry týraly habardarlyqty arttyrý aptalyǵy aıasynda 914 adam tómen dozaly kompıýterlik tomografııadan ótip, onyń 39-ynan ókpedegi qaterli úderiske kúdik týdyratyn oshaqty ózgerister anyqtaldy, dep habarlaıdy QR Densaýlyq saqtaý mınıstrligi.
Іs-sharalar onkologııalyq aýrýlarmen kúres jónindegi Keshendi jospar aıasynda halyqtyń habardarlyǵyn arttyrýǵa jáne ókpe aýrýlaryn erte anyqtaýǵa baǵyttalǵan.
Apta barysynda 1 287 adam onkolog dárigerlerdiń keńesin aldy. Olardyń 914-i keýde qýysy aǵzalaryna tómen dozaly kompıýterlik tomografııadan ótti.
Aktsııaǵa Qazaqstan turǵyndarymen qatar shetelde turatyn otandastar da qatysty. Máselen, Germanııadan kelgen eki qazaqstandyq elde bolǵan kezinde aktsııaǵa qatysyp, medıtsınalyq tekserýden ótken.
Tekserý nátıjesinde 39 adamnan nemese tekserilgenderdiń 4,3%-ynan ókpede qaterli úderiske kúdik týdyratyn oshaqty ózgerister anyqtaldy. Olardyń barlyǵy ózgeristerdiń sıpatyn naqtylaý jáne dıagnozdy rastaý úshin qosymsha tekserýge jiberildi.
Sonymen qatar mamandar obyr aldy ózgeristerdiń 70 jaǵdaıyn nemese 7,7%-yn anyqtady. Budan bólek, 433 adamnan nemese 47,4%-ynan basqa aýrýlar tabylǵan.
Qatysýshylarǵa qosymsha 218 dıagnostıkalyq zertteý men zerthanalyq taldaý júrgizildi.
– Apta qorytyndylary tek onkologııalyq úderiske kúdik týdyratyn ózgeristerdi ǵana emes, sonymen qatar ári qaraı medıtsınalyq baqylaýdy qajet etetin obyr aldy jaǵdaılar men basqa da aýrýlardy anyqtaýǵa múmkindik beretinin kórsetti. Erte dıagnostıka máseleni der kezinde anyqtap, qajetti emdi ýaqtyly bastaýǵa múmkindik beredi. Sondyqtan joǵary qaýip tobyna jatatyn adamdar tekserýden ótýdi keıinge qaldyrmaǵany mańyzdy, – dedi Qazaq onkologııa jáne radıologııa ǵylymı-zertteý ınstıtýtynyń radıologııa jáne ıadrolyq medıtsına bóliminiń meńgerýshisi Jandos Amanqulov.
Aktsııa kezinde onkologtar qatysýshylarǵa zertteýdiń maqsaty men mańyzyn, erte dıagnostıkanyń qajettiligin túsindirip, olardyń suraqtaryna jaýap bergen. Mınıstrlik málimetinshe, túsindirý jumystarynan keıin bastapqyda tekserýden bas tartqan kóptegen adam sheshimin ózgertip, zertteýden ótken.
Mamandar joǵary qaýip tobyna kiretin azamattarǵa tekserýdi keıinge qaldyrmaı, dıagnostıkadan ótý qajettiligin dárigermen talqylaýǵa keńes beredi.
Aıta keteıik, Qazaqstanda ókpe obyryn jasandy ıntellekt arqyly anyqtaý usynyldy.
