Ókpe obyryn tekserýge barǵan 914 adamnyń 39-ynan qaýipti ózgerister anyqtaldy
ASTANA. KAZINFORM — Qazaqstanda ókpe obyryna skrınıng kezinde 39 adamnan kúdikti ózgerister tabyldy, dep habarlaıdy Densaýlyq saqtaý mınıstrliginiń baspasóz qyzmeti.
Qazaqstanda ókpe obyry týraly habardarlyqty arttyrý aptalyǵy aıaqtaldy. Onkologııalyq aýrýlarmen kúres jónindegi Keshendi jospardyń sheńberinde halyqtyń aqparattandyrylýyn arttyrýǵa jáne ókpe aýrýlaryn erte anyqtaýǵa baǵyttalǵan is-sharalar barysynda 1 287 adam onkolog dárigerlerdiń keńesin aldy.
Olardyń 914-i keýde qýysy aǵzalaryna tómen dozaly kompıýterlik tomografııadan (TDKT) ótti. Aktsııaǵa Qazaqstan turǵyndarymen qatar, shetelde turatyn otandastarymyz da qatysty. Germanııadan kelgen eki qazaqstandyq elimizde bolǵan kezinde aktsııaǵa qatysyp, medıtsınalyq tekserýden ótti.
— Tekserý barysynda 39 adamnan (4,3%) ókpede qaterli isikke kúdik týdyratyn ózgerister anyqtaldy. Olar dıagnozdy naqtylaý úshin qosymsha tekserýge jiberildi. Sonymen qatar dárigerler70 adamnan obyr aldy ózgeristerdi, al 433 adamnan basqa da aýrýlardy anyqtady. Qatysýshylarǵa dıagnozdy naqtylaý úshin taǵy 218 qosymsha tekserý men zerthanalyq taldaý júrgizildi, — deıdi mamandar.
Aktsııa barysynda onkologtar qatysýshylarmen jeke aqparattyq-túsindirý jumystaryn júrgizdi. Osyndaı tásildiń arqasynda bastapqyda tekserýden ótýden bas tartqan kóptegen qatysýshy óz sheshimin ózgertip, zertteýden ótti.
— Apta qorytyndylary tek onkologııalyq úderiske kúdik týdyratyn ózgeristerdi ǵana emes, sonymen qatar ári qaraı medıtsınalyq baqylaýdy qajet etetin obyr aldy jaǵdaılar men basqa da aýrýlardy anyqtaýǵa múmkindik beretinin kórsetti, — dep atap ótti Qazaq onkologııa jáne radıologııa ǵylymı-zertteý ınstıtýtynyń radıologııa jáne ıadrolyq medıtsına bóliminiń meńgerýshisi Jandos Muhtaruly Amanqulov.
Erte dıagnostıka máseleni der kezinde anyqtap, qajetti emdi ýaqtyly bastaýǵa múmkindik beredi. Sondyqtan joǵary qaýip tobyna jatatyn adamdardyń tekserýden ótýdi keıinge qaldyrmaı, dıagnostıkanyń qajettiligin dárigermen talqylaǵany mańyzdy.
Budan buryn tegin onkologııalyq skrınıngte 1837 obyr jaǵdaıy rastalǵanyn jazdyq.
