Ókpe obyryn erte anyqtaıtyn júıe nege engizilmeı otyr – depýtat saýaly
ASTANA. KAZINFORM – Májilis depýtaty Sergeı Ponomarev Premer-Mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıev atyna depýtattyq saýal joldady.
Depýtattyń aıtýynsha, elimizde jasandy ıntellekt salasynyń damý baǵytyndaǵy jumystar kóbine formaldy sıpat alyp otyr.
- Ókinishke qaraı, is júzinde Prezıdenttiń jasandy ıntellektini damytý jónindegi tapsyrmalary kóbine profanatsııaǵa aınalyp, bı bıleıtin robottar men ChatGPT arqyly jasalǵan mazmuny jutań sýretter deńgeıinde qalyp otyr, – dedi Ponomarev.
Saýalda atap ótilgendeı, 2023 jyly Dúnıejúzilik bank granty aıasynda jáne Onkologııa jáne radıologııa ǵylymı-zertteý ınstıtýtymen birlesip, ókpe qaterli isigin kompıýterlik tomografııa arqyly anyqtaıtyn jasandy ıntellekt júıesi ázirlengen. Jobaǵa myńnan astam maman qatysyp, ázirleýshiler tarapynan 2 mlrd teńge ınvestıtsııa salynǵan. Sonymen qatar 200-den astam medıtsınalyq uıym men 500-ge jýyq qurylǵyny biriktiretin tsıfrlyq ınfraqurylym qurylǵan.
Alaıda depýtattyń málimetinshe, úsh jyl buryn Úkimet janyndaǵy keńeste pılottyq jobany iske qosý týraly sheshim qabyldanǵanyna qaramastan, júıe áli kúnge deıin tolyq engizilmegen.
- Úsh jyl boıy iske tolyq daıyn júıe ne sebepti paıdalanylmaı otyr – bul suraqqa naqty jaýap joq, – dedi ol.
Sergeı Ponomarev ókpe obyry Qazaqstanda onkologııalyq aýrýlar arasyndaǵy ólim-jitim boıynsha birinshi orynda turǵanyn atap ótti. Jyl saıyn bul dertke 3 myńnan astam adam shaldyǵady. Onyń aıtýynsha, erte dıagnostıkalaý kóptegen adamnyń ómirin saqtap qalýǵa múmkindik beredi.
Osyǵan baılanysty depýtat Ulttyq densaýlyq saqtaýdy damytý ǵylymı ortalyǵynyń áreketine baǵa berýdi, ókpe obyry skrınıngin kepildendirilgen medıtsınalyq kómek paketi aıasynda engizý máselesin qaıta qaraýdy jáne ekologııalyq táýekeli joǵary óńirlerde skrınıngti basym tártippen júrgizýdi usyndy.
Aıta keteıik, Ulybrıtanııada ókpe ragyna qarsy RNQ vaktsınasynyń synaǵy bastaldy.
