Ókpe qabynýynan kóz jumǵandar sany 1,9 ese artty - Ajar Ǵınııat

NUR-SULTAN. QazAqparat - Qazaqstanda ókpe qabynýynan qaıtys bolǵandar sany 1,9 ese artyp otyr. Bul týraly QR Densaýlyq saqtaý vıtse-mınıstri Ajar Ǵınııat aıtty, dep habarlaıdy QazAqparat tilshisi.

«Ókpe qabynýymen aýyrǵan adamdardyń sanyn jasyryp otyrǵan joqpyz. Ol elektrondy júıede tur. 1 qańtardan 2 tamyzǵa deıin aýyrǵandardyń sany 3,3 ese ósti. Al qaıtys bolǵan adamdardyń sany 1,9 ese artyp otyr «, - dedi ol Ortalyq kommýnıkatsııalar qyzmetindegi baspasóz máslıhaty barysynda.

Osy rette Ajar Ǵınııat ókpe qabynýynan qaza tapqandardyń nelikten statıstıkaǵa qosylmaǵandyǵyn túsindirip ótti.

«Óıtkeni, 1 tamyzǵa deıin ókpe qabynýy búkil dúnıejúzi qoldanatyn aýrýlardyń halyqaralyq jiktemesine saı pnevmonııa aýrýy retinde jiktelgen. Sóıtip elektrondy júıege túsip ketti. Árbir dáriger ózi emdegen naýqasyn jiktep, júıege salyp otyrady. Al qazir dárigerler kóptegen aýrýdy emdep, endi-endi ál jınap jatyr desem, ótirik emes», - dedi vıtse-mınıstr.

Onyń dereginshe, 2019 jyldyń 1 qańtary men 2 tamyz aralyǵynda elimizde ókpe qabynýynan 2 033 adam qaıtys bolǵan. Al osy jyldyń dál osyndaı kezeń ishinde 4 042 adam ómirden ozǵan.