OQO jyl sońynda sandyq telehabar taratýǵa kóshedi
Bul týraly Ońtústik Qazaqstan oblysynda Aqparat jáne kommýnıkatsııalar mınıstrliginiń BAQ salasyndaǵy memlekettik saıasat departamentiniń dırektory Eldos Náshiráli men «Qazteleradıo» AQ-nyń tutynýshylardy qoldaý jáne satý ortalyǵy dırektory Ǵanı Tumatovtyń qatysýymen ótken brıfıng barysynda málim boldy, dep habarlaıdy QazAqparat.
BAQ ókilderimen kezdesken spıkerler jańa formatqa kóshýdi qamtamasyz etý úshin úlken jumystyń atqarylǵandyǵyn atap ótti.
Atap aıtqanda, óńirde 79 radıotelevızııalyq stansylar salynyp, olardyń taratý aýmaǵy 2,4 mln halyq turatyn 860 eldi mekendi qamtydy. «Teleradıo habarlaryn taratý» Zańynda teleradıonyń habar taratýy jańa formatqa kóshetinin halyqqa aldyn ala habarlaý kerektigi kórsetilgen. Osyǵan baılanysty oblys ákimdiginde arnaıy jıyn ótip, onda sandyq efırlik teleradıo habarlaryn taratýǵa kóshýdi qamtamasyz etý jónindegi is-sharalar jospary bekitilgen.
«Sandyq efırdiń analogtyq júıeden aıtarlyqtaı artyqshylyqtary bar. Atap aıtqanda, sandyq tehnologııa arqyly joǵary sapadaǵy beıne men dybysqa qol jetkizemiz. Sondaı-aq, taralymy aýqymdy kóptegen telearnalardy kórý múmkindigi týady. Máselen, oblys ortalyǵynda 30 arnaǵa deıin, al aýyldaǵy kórermender keminde 15 arnany tamashalaı alady», - dedi Eldos Náshiráli.
Qazirgi ýaqytta oblysta osy baǵytta daıyndyq jumystary júrgizilýde. Elimizde osy jyldyń aıaǵyna deıin Manǵystaý, Ońtústik Qazaqstan jáne Jambyl oblystarynyń sandyq taratylymǵa kóshýi josparlanyp qoıypty.
