OQO jurtshylyǵy strategııalyq qujat memlekettiń órkendeýine negiz bolatynyna senimdi
ShYMKENT. QazAqparat - Ońtústik Qazaqstan oblysynda Elbasy Nursultan Nazarbaevtyń bıylǵy jylǵy halyqqa arnaǵan Joldaýyn talqylaýǵa arnalǵan oblys aktıviniń otyrysy ótti. Sharaǵa oblys, aýdan, qalalardyń basshylary, oblystyq máslıhat depýtattary, úkimettik emes uıym ókilderi men jastar uıymdary qatysty, - dep habarlaıdy «QazAqparat» HAA tilshisi.
Jıynda oblys ákimi J.Túımebaev bıylǵy jylǵy strategııalyq qujattyń aımaqtyń damýyna jol ashatyn basym baǵyttaryna keńinen toqtaldy.
«Bıylǵy joldaý el ekonomıkasyn nyǵaıtýmen qatar, halyqtyń ál-aýqatyn jasqartý boıynsha jańa mindetter júkteıdi. Osy oraıda óńirimizde eksportqa baǵyttalǵan kásiporyndardyń sanyn arttyrý maqsatynda jergilikti taýar óndirýshilerdiń básekelik qabilettiligin joǵarlatyp, oblysymyzdaǵy 1,1 mlrd AQSh dollaryn quraıtyn eksporttyq aınalymdy 2 esege arttyrýymyz qajet. Elbasymyzdyń bizge árdaıym qoıatyn basty talaby - jeke jáne sheteldik ınvestıtsııa kóleminiń ekonomıkadaǵy úlesin arttyrý. Óńirimizdegi búgingi tańdaǵy 14,5 paıyz kólemindegi sheteldik ınvestıtsııany 2020 jylǵa deıin 25 paıyzǵa ulǵaıtýymyz kerek. Bul úshin bizder ınvestorlarmen tyǵyz jumys júrgizip, olarǵa tıimdi jaǵdaı jasaýǵa tıistimiz. Búginniń ózinde oblystyń barlyq óńirlerinde ınvestorlarmen jumys isteıtin arnaıy mobıldyk toptar qurylǵan», - dedi Janseıit Qanseıituly.
Elbasynyń bıylǵy Joldaýynda bıznes-ortany túbegeıli jaqsartý jáne keńeıtý, elimizde ınvestıtsııalyq klımatty nyǵaıtý, jappaı kásipkerlikti qoldaý tetikterin odan ári jetildirý kerektigi, sonyń ishinde otbasylyq kásipkerlikti damytý baǵytynda keshendi sharalar júrgizýge basymdyq berilip otyr. Bul turǵyda óńirde damyǵan elderdiń ozyq standarttary men tájirıbesin engizý arqyly júıeli jumystardy qolǵa alý qajettigi naqtylandy.
Keleli keńeste sóz alǵan oblystyq máslıhat depýtaty Ómirzaq Meldehanov Elbasy Joldaýyndaǵy saıası utymdy usynystar men basym baǵyttardy atap ótti. Sondaı-aq, jıynda oblystyq ózbek etnomádenı ortalyǵynyń tóraǵasy Ikram Hashımjanov, oblystyq «Atameken» kásipkerler palatasynyń tóraǵasy Asqar Ábýbákirovter sóz alyp, Elbasy joldaýynyń utymdy usynystary týraly pikirlerin ortaǵa saldy.
Budan bólek, jıynda óńirdegi agrarlyq sektordy damytyp, eksporttyq ónim kólemin arttyrý máselesi sóz boldy. «Sondyqtan birinshi kezekte oblystaǵy iri kanaldardy qalpyna keltirip, sýarmaly jerlerdiń kólemin 900 myń gektarǵa jetkizýimiz qajet», - dedi jergilikti bılik ókilderi. Mine, osy aıtylǵan mindetter men maqsattardy oryndaı otyryp, 2025 jylǵa oblystyń jalpy óńirlik ónim kólemindegi úlesin 9 paıyzdan 15 paıyzǵa ulǵaıtýǵa mýmkindik týady.
Keńeste Elbasy júktegen mindetterdi júzege asyrýdyń baǵyttary belgilendi. Atap aıtsaq, ІT salasyn damytý, agrarly-ındýstrıaldy aımaqta ınnovatsııalyq ındýstrııalandyrý trendin túzý jáne kúsheıte túsýge basa nazar aýdaryldy. Ónerkásip, agroónerkásiptik keshen, kólik pen logıstıka, qurylys sektory jáne basqa salalar jumystaryn jandandyrý negizge alyndy.
Jıyn sońynda Joldaýdy halyqqa túsindirý jáne iske asyrý sharalaryn bekitken qarar qabyldandy. Endi úgit-nasıhat toptary halyq arasynda Joldaýdy keńinen túsindirý jumystaryn júrgizedi.
Aınur Aqbaeva
