OQO júrgizýshileri úsh kúnde 864 ret jol erejesin buzǵan
ASTANA. QazAqparat - Ońtústik Qazaqstan oblysynyń aýmaǵynda júrgizilgen «Avtobýs» jedel-aldyn alý is-sharasynyń úsh kúninde jol qozǵalysy erejesin buzýdyń 900-ge jýyq faktisi anyqtaldy.
Ońtústik Qazaqstan oblysynyń aýmaǵynda apattyq jaǵdaılardy tómendetý, jol qozǵalysy erejelerin buzý jaǵdaılaryn boldyrmaý, júrgizýshiler arasynda kóliktik tártipti saqtaý maqsatynda júrgizilgen sharaǵa myńnan astam polıtsııa jáne basqa da qyzmetter ókilderi, kóliktik baqylaý ınspektsııasy, memlekettik organdar men qoǵamdyq uıymdar qyzmetkerleri jumyldyryldy.
Shara barysynda qoǵamdyq jáne jolaýshylar tasymaldaý kólikteriniń júrgizýshileri tarapynan jol erejesin buzýdyń 864 deregi anyqtaldy.
Polıtseıler jyldamdyqty arttyrǵan 76, manevr jasaý erejesin buzǵan 117, eńbek jáne demalys tártibin saqtamaǵan 11, kólik quraldaryn basqarý kezinde uıaly telefon paıdalanǵan 243, jolaýshylardy jáne bagajdy tasymaldaýǵa ruqsat berý kýáligi bolmaǵan 20 júrgizýshini anyqtady.
Sondaı-aq, zańsyz qaıta jabdyqtaýdyń 18, tehnıkalyq baıqaýdan ótpeýdiń 105, jaıaý júrginshilerge jol bermeýdiń 50, aýaǵa shyǵarylatyn qaldyqty zattardyń normadan asýynyń 20 deregi anyqtalsa, qalǵan 92 derek basqa da buzýshylyqtar.
Ońtústikqazaqstandyq polıtsııa qyzmetkerleri júıeli túrde ótkizip otyratyn aldyn alý is-sharalary jolaýshylar tasymaldaıtyn avtokólikterdiń qatysýymen oryn alatyn jol-kólik oqıǵalarynyń jolyn kesip, sanyn azaıtady dep senedi.
