OQO: Jumyspen qamtý ortalyǵynyń eks-dırektoryna halyqaralyq izdeý jarııalandy
ShYMKENT. QazAqparat - Shymkent qalalyq Jumyspen qamtý ortalyǵynyń eks-dırektoryna halyqaralyq izdeý jarııalandy. Oǵan 400 mln teńgeden astam memleket qarajatyn jymqyrdy degen kúdik keltirilýde. Bul týraly búgin oblystyq sotta ótken brıfıngte málim boldy, dep habarlaıdy QazAqparat tilshisi.
Oblystyq sottyń sýdıasy Búrkit Baıdýllaevtyń sózinshe, Abaı aýdandyq soty 5 qańtar kúni óńirdiń Memlekettik kirister departamenti tergeýshisiniń ótinishhaty boıynsha Shymkent qalalyq Jumyspen qamtý ortalyǵynyń burynǵy dırektory Asyljan Jamalbekovke halyqaralyq izdeý jarııalaý týraly qaýly shyǵarǵan. Jamalbekov asa aýyr qylmys jasady dep kúdiktelýde.
«Ol memlekettik qyzmetti atqarýǵa teńestirilgen laýazymdy tulǵa bola tura, uıymdasqan qylmystyq topty ózine baǵynyshty qyzmetkerlerdiń arasynan qurǵan. Toptyń basqarýshysy retinde 2015 -2017 jyldar aralyǵynda kúdikti I.Djýnýsalıevamen adamdar toby bolyp aldyn-ala sóz baılasyp, bótenniń múlkin jymqyrý maqsatynda, senimdi teris paıdalaný jolymen bótenniń múlkine quqyqty ıemdenip, baǵdarlama aıasynda bólingen qarajattardyń ysyrap etilýine yqpal jasaǵan. Ol úshin ózine materıaldyq syıaqy alyp, memleket bıýdjetine jalpy kólemi 437 384 604 teńge zalal keltirgen», - delingen qaýlyda.
Atalmysh fakti boıynsha ortalyq dırektorynyń ústinen Qylmystyq kodekstiń 262-baby 3-bóligimen («Uıymdasqan top, qylmystyq uıym qurý jáne olarǵa basshylyq etý, sol sııaqty olarǵa qatysý, óziniń qyzmet babyn paıdalana otyryp jasaǵan is-áreketter»), 190-baby, 4-bóliginiń 2-tarmaǵymen («Alaıaqtyq») is qozǵalǵan. Kúdikti ustalǵan jaǵdaıda Shymkent qalasynyń tergeý ızolıatoryna jetkiziletin bolady.
Aıta keteıik, Jamalbekov Asyljan Sháripbekuly 1986 jyly Ońtústik Qazaqstan oblysy, Báıdibek aýdany, Shaıan eldi mekeninde dúnıege kelgen, úılengen, buryn isti bolmaǵan. Ol osy jyldyń qarasha aıynan bastap tergeýden jasyrynyp júr. 31 jastaǵy sheneýnik oblystyń tanymal otbasynan shyqqany da belgili. Onyń ákesi oblystyq máslıhat depýtaty, «OQO Azamattyq alıansy» zańdy tulǵalar birlestiginiń tóraǵasy, «Nur Otan» partııasy OQOF komıssııa tóraǵasy. Al týǵan aǵasy Saıram aýdany ákiminiń orynbasary qyzmetin atqarady.
