OQO: Jóndeýden ótken «Mırnyı» kanaly paıdalanýǵa berildi
ShYMKENT. QazAqparat - El Táýelsizdiginiń 25 jyldyǵyna oraı Ońtústik Qazaqstan oblysynyń Otyrar aýdanyna qarasty Qarǵaly aýyl okrýgindegi «Mırnyı» kanaly el ıgiligi úshin paıdalanýǵa berildi, dep habarlaıdy aýdan ákimdiginiń baspasóz qyzmeti.
Dıhan qaýymynyń qýanyshyn arttyryp, táýesizdigimizdiń mereıli merekesine tartý bolǵan kanaldyń saltanatty tapsyrylý sharasyna aýdan ákimi Erlan Aıtahanov arna ıy qatysty. Kópshilikti egemendigimizdiń 25 jyldyǵymen quttyqtaǵan aýdan basshysy «Elbasymyzdyń dara saıasatynyń arqasynda álemdik ekonomıkalyq qıyndyqtarǵa qaramastan barlyq jaǵdaılar jasalynýda. Onyń dáleli 30 jylǵa jýyq jóndeý jumystaryn kórmegen, QR Táýelsizdiginiń 25 jyldyǵy qarsańynda paıdalanýǵa berilip otyrǵan «Mırnyı» kanaly. Aǵyn sý arnasynyń 14,2 shaqyrym betonmen qaptalyp, 7 dana gıdroqurylym jóndeldi. 2 dana qubyrly ótkel, 15 dana sý ótkizgish qurylym ornatyldy. 4 dana SNP 500/10 nasostary jańadan ornatylyp, 16,0 shaqyrym elektr jelisi tartyldy.
Osyndaı jumystardyń nátıjesinde egilmeı otyrǵan 674 gektar jerdiń sýmen qamtylýy jaqsaryp, 1300 gektar jańadan jer qosylyp, tolyqtaı egiletin bolady. Dıhandardyń áleýmettik jaǵdaıy jaqsaryp, turmys deńgeıi kóteriledi. Táýelsizdik kúni qarsańynda paıdalanýǵa birilip otyrǵan ıgi ister jańa qýanyshty sáttiń bastaýy bolsyn» degen izgi tilegin bildirdi.
Egis alqabynyń kólemin ulǵaıtý, aǵyn sý tapshylyǵyn joıý baǵytyndaǵy osyndaı aýqymdy ister aldaǵy ýaqytta da óz jalǵasyn tabatyn bolady.
Shara barysynda aýyldyq ardagerler keńesiniń tóraǵasy Kenjeǵul Abdýllaev aq batasyn berip, kanaldyń saltanatty túrde ashylý lentasyn qyıdy.
