OQO: Jedel medıtsınalyq qyzmetti damytý qolǵa alynady
ASTANA. QazAqparat - Ońtústik Qazaqstan oblysynyń ákimi Janseıit Túımebaev «Hemogens Health Care» túrik kompanııasynyń Bas dırektory Nadjıe Arpadjı hanymmen kezdesti, dep habarlaıdy QazAqparat.
Kezdesýde «Hemogens Health Care» kompanııasy men Ońtústik Qazaqstan oblysynyń ákimdigi arasynda óńirde jedel medıtsınalyq kómek qyzmetin jetildirý boıynsha memarandýmǵa qol qoıyldy.
Túrkııada jáne BAÁ osyǵan uqsas jobalardy endirýde úlken tájirıbesi bar týrkııalyq kásipker Ońtústik Qazaqstanda memlekettik-jekemenshik áriptestik sheńberinde jedel medıtsınalyq kómektiń úlgilik kishi stantsııalaryn salý, biregeı quraldarmen jáne kólikpen jabdyqtaý, medıtsına mamandaryn oqytý, biryńǵaı aqparattyq-taldamalyq dıspetcherlik ortalyq qurý syndy jobalardy júzege asyrmaq.
Joba aıasynda óńirdiń densaýlyq saqtaý salasyna 3,5 mlrd. teńge ınvestıtsııa salynyp, keler jyly onyń 1,8 mlrd. teńgesi jedel medıtsınalyq kómektiń ortalyq stantsııasynyń kishi stantsııalaryn salýǵa jáne jabdyqtaý men sanıtarlyq avtokóliktiń 25 birligin satyp alýǵa jumsalatyn bolady.
Sondaı-aq, jedel medıtsınalyq kómek kórsetý boıynsha jańa e-formatta biryńǵaı qalalyq aqparattyq-taldamalyq dıspetcherlik ortalyq qurý, medıtsına qyzmetkerlerin oqytý, medıtsınalyq týrızmdi damytý boıynsha jumys júrgiziletin bolady.
Bul joba Ońtústik Qazaqstan oblysynda densaýlyq saqtaý salasyn jáne medıtsınalyq týrızmdi damytýǵa septigin tıgizedi. Memorandým bizdiń óńirdiń túrik ınvestıtsııalyq ınstıtýttarymen yntymaqtastyǵyn jańa sapaly deńgeıge kóteredi.
Qazirgi ýaqytta, Túrkııa sanıtarlyq avıatsııa men jedel medıtsınalyq kómek qyzmeti turǵysynan álemdegi eń damyǵan el bolyp tabylady. Túrkııa qalalarynda 94% jaǵdaıda shuǵyl kómek 10 mınýt ishinde, al aýyldyq jerlerde 96% jaǵdaıda shuǵyl kómek 30 mınýt ishinde kórsetiledi.
