OQO jastary halyqty tasqynnan zardap shekkenderge kómek kórsetýge shaqyrdy

ShYMKENT. QazAqparat - Ońtústik Qazaqstan oblysynda belsendi jastar sý tasqynynan zardap shekken Shyǵys Qazaqstandaǵy turǵyndarǵa kómek qolyn sozýǵa arnalǵan Úndeý joldady. Oblys jurtshylyǵyn qaıyrymdylyqqa shaqyrý bastamasy Qazyǵurt aýdanynda ótken «Keme qalǵan» kıeli ornynyń aınalasyn kóriktendirýge arnalǵan aktsııa barysynda qolǵa alyndy, dep habarlaıdy QazAqparat tilshisi.

Oblystyq «Rýhanı jańǵyrý» jobalyq keńsesiniń bastamasymen ótken sharaǵa oblys jastary bir kisideı atsalysty. «Atadan mal qalǵansha tal qalsyn» degen aýdannyń aqsaqaldary ıgi bastamaǵa qoldaý bildirip, jalyndaǵan jastarǵa aq batasyn berdi. «Keme qalǵan» kıeli ornyna jınalǵan myńǵa jýyq eriktiler 1 300 túp kóshet otyrǵyzdy.

«Qazaqstannyń kıeli jerleriniń geografııasy» jobasy qasıetti jerlerimizdiń mereıin tasytýda. Oǵan dálel, tirshiliktiń bastalǵan jeri - Qazyǵurttyń Keme qalǵan jeriniń kógaldandyrylyp, kópshiliktiń kelýine laıyqty jaǵdaı jasalýy bolyp tur. Munyń bári tutasa kelgende halqymyzdyń ulttyq biregeıliginiń myzǵymas negizin quraıdy. Kıeli oryndarymyz - neshe ǵasyr ótse de bizdi kez kelgen rýhanı jutańdyqtan saqtap, aman alyp shyǵatyn sımvoldyq qalqanymyz ári ulttyq maqtanyshymyz ekeniń umytpaýmyz kerek», - dedi Qazyǵurt aýdandyq ardagerler keńesiniń tóraǵasy Asanbaı Omarov. 

Aktsııa sońynda oblystyń belsendi jastary «Rýhanı jańǵyrý» atty jazýdy keltirip, arnaıy fleshmob uıymdastyrdy. Jyl basy Naýryzdyń asy - naýryz kójeden dám tatyp, ulttyq jón-joralǵylardy tamashalady.

Aıta keterligi, bıyl Ońtústik Qazaqstan oblysynyń Naýryz meıramy tirshilik kózi bastaý alǵan kıeli Qazyǵurt taýynyń eteginde ótedi dep josparlanǵan.