OQO jańa jumys oryndaryn ashý jóninen kósh bastady
ASTANA. QazAqparat - Ońtústik Qazaqstan oblysynda jyl basynan beri 30 myńnan astam, naqtyraq aıtqanda, 30 348 jumys orny ashylǵan, dep habarlaıdy oblys ákiminiń baspasóz qyzmeti.
Jańa jumys oryndarynyń qurylýy boıynsha óńir elimizdegi barlyq oblystar ishinde kósh bastap tur. Al ashylǵan jańa jumys oryndaryna 4 127 azamat jumyspen qamtý organdary arqyly jumysqa ornalasypty. Bul týraly oblystyq jumyspen qamtýdy úılestirý jáne áleýmettik baǵdarlamalar basqarmasynyń mamandary habarlady.
Tarqatyp aıtsaq, 2017 jyldyń 1 shildesine deıingi málimetke sáıkes, jańadan ashylǵan jumys oryndarynyń ishinde 1 667 oryn «Nurly jol» baǵdarlamasy boıynsha, 1 030 oryn «Nurly jer», 115 jumys orny «Indýstrııaldy-ınnovatsııalyq damý», 396 oryn «Bıznestiń jol kartasy 2020», 18 134 oryn memlekettik salalyq baǵdarlamalar arqyly qurylsa, 7 627 oryn «Óńirlerdi damytý» memlekettik baǵdarlamasy men 1 379 oryn «2020 jylǵa deıingi aımaqtardy damytý» memlekettik baǵdarlamasy aıasynda ashylǵan.
Jalpy, 2017 jyldyń jospary boıynsha óńirimizde memlekettik jáne salalyq baǵdarlamalar negizinde 66 764 jańa jumys oryndary ashylatyny josparlanyp, onda 5 677 adamdy jumyspen qamtý kózdelip otyr.
Respýblıkada ashylǵan jańa jumys oryndary týraly málimetti jınaqtaǵan Almaty men Astana qalalarynyń jumyspen qamtýdy úılestirý jáne áleýmettik baǵdarlamalar departamentteriniń málimetinshe, bul saladaǵy kóshti Ońtústik Qazaqstan obylysynan soń Astana qalasy jalǵastyrady. Onda osy jyldyń 1 shildesine deıin 17 033 jańa jumys orny qurylǵan. Kezekti odan ármen tarqatsaq, Almaty oblysynda 13 020 jumys orny, Almaty qalasynda 12 830, Mańǵystaýda 11 821, Jambylda 11 643, Atyraý oblysynda 10 656, Shyǵys Qazaqstan oblysynda 8 529 jumys orny jańadan ashylsa, Aqtóbede 8 204, Soltústik Qazaqstanda 7 668, Aqmola oblysynda 7 217, Pavlodarda 7 186, Qyzylordada 7 017, Batys Qazaqstan oblysynda 5 938, Qostanaıda 5 603, al Qaraǵandyda 5 493 jumys orny qurylǵan.
Jalpylaı aıtqanda, Qazaqstanda jyl basynan beri jarty jylda 170 206 jańa jumys orny qurylsa, onyń 118 240 orny turaqty jumys ornyna jatady. Al ashylǵan jumys oryndarynyń 78 myńǵa jýyǵy aýyldy jerlerde ashylǵan.
