OQO: Zamanaýı ájethana ashamyn dep kúlkige qalǵan paraqor ákimge úkim shyqty
Maqtaaral aýdandyq sotynyń sýdıasy Seıilhan Musabekovtyń aıtýynsha, burynǵy ákim Baıdýaly Bazarbaev Qylmystyq kodekstiń 366-baby 2-bóligimen («Para alý») aıypty dep tanyldy. Ol jaza retinde 12 mln teńge aıyppul tóleý mindetteldi.
«Aıyppuldy bir aı merzimde tóleýi tıis sheneýnik búgingi kúnge deıin 4 mln teńgesin tólep qoıdy. Qalǵan somany 15 sáýirge deıin tóleýge mindetteldi», - dedi Seıilhan Musabekov.
Eske salaıyq, ótken jyldyń qańtar aıynda Maqtaaral aýdanynyń ortalyǵy Jetisaı qalasynda 3,1 mln teńgege zamanaýı úlgidegi qoǵamdyq ájethana salyp, ony saltanatty túrde ashqan Jetisaı ákimi Baıdýaly Bazarbaev ońtústikqazaqstandyqtar arasynda «tanymaldylyqqa» ıe bolǵan edi. Al 2018 jyldyń 20 aqpany kúni ol 200 myń teńge para alý kezinde ustaldy.
Anyqtalǵandaı, ákimdik qyzmetkerleri Maqtaaral aýdanyndaǵy jekemenshik balabaqshalardyń birin tekserip barǵanda bala sany qujatta kórsetilgendeı 125 emes - 75 bolǵan. Al oǵan ákimdik tarapynan «Balapan» baǵdarlamasy arqyly 125 balaǵa aqsha tólenip kelgen. Osy kemshilikke oraı ákimshilik qyzmetkerleri akti toltyryp ketken. Artynsha balabaqsha ıesi Jetisaı qalasynyń ákimi Baıdýaly Bazarbaevqa osy isti jyly jaýyp qoıýdy suranǵan. Buǵan ákim bastapqyda 500 myń teńge suraǵan. Eki tarap «saýdalasyp», aqyrynda 200 myń teńgege kelisken.
Ol kepil retinde quny 13 mln teńge turatyn úıin qoıyp, úıqamaqqa alynǵan bolatyn.
Eks-ákim tergeý barysynda para alǵanyn moıyndady. Sondyqtan qylmystyq is tez arada qaralyp, úkim shyǵaryldy.